Turkiyada kemalarning Isroilga aloqadorligi tekshirilmoqda

Turkiya portlari kemalardan Isroil bilan aloqador emasligini tasdiqlovchi xatlar talab qilmoqda. Bu haqda o‘z manbalariga tayanib, “Cumhuriyet” xabar berdi.

Kemasozlik sohasidagi ikki manbaning ma’lum qilishicha, Turkiya portlari ma’muriyatlari sudxo‘rlik agentlaridan kemalar Isroil bilan bog‘liq emasligini hamda bu mamlakatga harbiy yoki xavfli yuk tashimayotganini tasdiqlovchi xatlar so‘ray boshlagan.

Manbalarning aytishicha, port kapitani idorasi bunday yozma kafolatlarni taqdim etishni og‘zaki topshirgan, ammo rasmiy doiraviy hujjat chiqarilmagan. Birinchi manbaga ko‘ra, bu ko‘rsatma butun Turkiya portlariga taalluqlidir.

Ikkinchi manbaning ma’lum qilishicha, kafolat xatida kema egalari, menejerlari va operatorlari Isroil bilan hech qanday aloqaga ega emasligi qayd etiladi. Shuningdek, Isroilga yo‘nalgan kemalarda portlovchi moddalar, radioaktiv materiallar yoki harbiy texnika kabi yuklar mavjud emasligi ko‘rsatiladi.

Eslatib o‘tamiz, avvalroq Turkiya Prezidenti Rajab Toyib Erdo‘g‘an G‘azo sektoridagi inqiroz bo‘yicha G‘arb mamlakatlarining sustkash pozitsiyasi xalqaro hamjamiyatga bo‘lgan ishonchni yemirayotganini aytgandi. Erdo‘g‘anning qo‘shimcha qilishicha, Turkiya G‘azo masalasida boshidan buyon qat’iy pozitsiyada turib, oziq-ovqat, dori va tibbiy yordam yetkazib bermoqda, yaradorlarni davolash uchun qabul qilmoqda.