Туркия Ливия ва Қорабоғга киргани каби Исроилга ҳам кириши мумкин – Эрдўған

Президент Ражаб Тойиб Эрдўған Туркия бир пайтлар Қорабоғ ва Ливияга кирганидек, Исроилга ҳам кириши мумкинлигини айтди. Бу ҳақда у кеча, 28 июль куни Ризо вилоятидаги ҳукмрон партия қароргоҳида бўлиб ўтган йиғилишда сўз очди.  

Эрдўған, биринчи навбатда, Туркия мудофаа саноати ютуқларини қайд этган, аммо унинг фикрича, агар улар муҳимроқ бўлганида, Исроил “Фаластинга қилган ишни қилмаган бўларди”. Туркия етакчиси Исроилга кирмаслик учун ҳеч қандай сабаб йўқлигини таъкидлади. 

Туркия етакчисининг айтишича, Фаластин раҳбари Маҳмуд Аббос турк томонининг республика парламентида сўзлашиш таклифига жавоб бермаган. Аввалроқ Туркия Президенти Фаластин раҳбарини Анқара ташаббусига эътибор бермагани учун узр сўрашга чақирганди.

Эрдўғаннинг бу чиқишидан сўнг, Исроил Ташқи ишлар вазири Исраэль Кац Туркия Президентини Исроилга бостириб киришидан мумкин бўлган оқибатлар ҳақида огоҳлантирган.

“Эрдўған Саддам Ҳусайн изидан бормоқда ва Исроилга ҳужум қилиш билан таҳдид қилмоқда. У ерда (Ироқда) нима бўлганини ва ҳаммаси қандай тугаганини эсласин”, деб ёзди Кац Х ижтимоий тармоғида.