Туркия Британиядан қирувчи самолётлар сотиб олади

Туркия Буюк Британия билан 20 та янги Eurofighter Typhoon қирувчи самолётларини харид қилиш бўйича 9 миллиард евролик шартнома имзолади. Бу ҳақда “Hurriyet” хабар берди.

Битим Буюк Британия Бош вазири Кир Стармернинг Анқарага илк расмий ташрифи чоғида тузилган. Стармер Туркиянинг бу қарорини олқишлаб, мамлакатлар янада яқинлашганини таъкидлаган. 

“Биз Европанинг турли бурчакларида жойлашган бўлишимиз мумкин, аммо бугун биз ҳар қачонгидан ҳам яқин ҳамкорлардирмиз. Бу битим НАТО хавфсизлигини мустаҳкамлайди, икки томонлама мудофаа ҳамкорлигини чуқурлаштиради ва иқтисодий ўсишга туртки беради. Шунингдек, 20 мингта британиялик учун иш ўринлари яратади. Мен фахрланаман. Британиянинг қирувчилари Туркия ҳарбий-ҳаво кучларининг ажралмас қисмига айланади”, деган Стармер. 

Туркия Президенти Ражаб Тойиб Эрдўған эса битимни “икки яқин иттифоқчи ўртасидаги стратегик алоқаларнинг янги рамзи” деб атаган.

Стармернинг айтишича, келажакда самолётлар сонини ошириш имконияти ҳам кўзда тутилган.

Қайд этиш жоиз, бу 2017 йилдан бери Британия қирувчилари учун биринчи йирик буюртма бўлиб, Туркиянинг ҳарбий-ҳаво кучларини мустаҳкамлашни мақсад қилган.

Умуман олганда, Туркия сўнгги вақтларда дунё мамлакатлари билан мудофаа соҳасида яқиндан ҳамкорлик қилмоқда. Жорий йилнинг июль ойида Анқара ва Лондон Eurofighter самолётларини етказиб бериш бўйича дастлабки келишувни имзолаган эди. Уларни Буюк Британия, Германия, Италия ва Испаниянинг ҳамкорлигида ишлаб чиқарувчи BAE Systems компанияси бошқаради. Битим Германия бу савдога қарши чиқмаслигини билдирганидан сўнг тузилган.

Туркия бундан ташқари Қатардан 12 та ва Уммондан 12 та ишлатилган Typhoon самолётларини ҳам сотиб олишни режалаштирмоқда. Мамлакатнинг бу қадамлари катта эҳтимол билан Исроил билан яқинлашиб келаётган урушга дарак беради. Шу сабабдан ҳам Туркия ўз мудофаасини куйчайтираётган бўлиши мумкин. 

Бу қуроллардан ташқари, Анқара АҚШнинг F-35 дастурига қайтишни ҳам истамоқда. Туркия 2019 йилда Россиянинг C-400 мудофаа тизимини сотиб олгани сабаб дастурдан чиқарилган эди.

Эрдўған яқинда АҚШ Президенти Дональд Трамп билан Оқ уйдаги учрашувда F-35 самолётлари савдосини ҳам муҳокама қилган.