Тўқаев Қозоғистондаги сиёсий муҳит бўйича халққа мурожаат қилиши кутилмоқда

Қозоғистон Президенти Қосим-Жомарт Тўқаев эртага, 16 март куни Қозоғистон халқига мурожаат қилади. Давлат раҳбарининг мурожаати сиёсий ислоҳотларнинг янги дастурига бағишланади. Бу ҳақда бугун, 15 март куни Президент матбуот котиби Берик Уали маълум қилди. 

“16 март куни давлат раҳбари Қосим-Жомарт Тўқаев Қозоғистон Республикаси парламенти палаталарининг қўшма мажлисида Қозоғистон халқига Мурожаатнома билан чиқишни режалаштирмоқда. Президентнинг бу галги Мурожаатномаси сиёсий ислоҳотларнинг янги дастурини амалга ошириш ва яқин келажакда тадбиқ этиладиган қатор ижтимоий-иқтисодий чора-тадбирларга бағишланади”, деб ёзди Facebook’даги саҳифасида. 

Унга кўра, учрашувни республика телеканаллари жонли эфирда намойиш этади. 

Аввалроқ Уали Тўқаев март ойида Қозоғистон халқига йўллаган мурожаатида январь ойидаги тартибсизликлар бўйича терговнинг дастлабки натижаларини оммага эълон қилишни режалаштираётганини айтганди.

Қозоғистондаги намойиш

Қозоғистонда 2022 йилнинг биринчи кунларида оммавий норозилик намойишлари бошланди — мамлакат ғарбидаги Жанаозен ва Ақтау шаҳарлари аҳолиси суюлтирилган газ нархининг икки баробар ошишига қарши чиқди. Кейинчалик норозилик намойишлари бошқа шаҳарларга, жумладан, эски пойтахт ва Республиканинг энг йирик шаҳри Олма-отага ҳам тарқалди: у ерда талончилик бошланди, намойишчилар давлат муассасаларига ҳужум қилишди, қурол-яроғларни олиб кетишди. Бунга жавобан расмийлар 19 январга қадар бутун мамлакат бўйлаб фавқулодда ҳолат эълон қилди ва аксилтеррор операциясини бошлади. БМТ маълумотларига кўра, Қозоғистондаги намойишлар чоғида 1000 га яқин одам жароҳатланган. Мамлакат Бош прокуратураси маълумотларига кўра, тартибсизликлар натижасида 4578 киши жароҳатланган, 225 киши ҳалок бўлган, улардан 19 нафари хавфсизлик хизмати ходимлари.  

5 январь куни эрталаб Қозоғистон Президенти Қосим-Жомарт Тўқаев ҳукуматни истеъфога чиқарди ва Хавфсизлик кенгашига ўзини раҳбар этиб тайинлади. Ўз раҳбарлигидаги Хавфсизлик кенгашининг биринчи йиғилишида Тўқаев Қозоғистондаги вазиятни давлат яхлитлигига путур етказувчи деб баҳолади ва “террорчилик таҳдидини енгишда” КХШТдан ёрдам сўраганини айтди. КХШТ Коллектив хавфсизлик кенгаши мамлакатдаги вазиятни нормаллаштириш учун Қозоғистонга коллектив тинчликпарвар кучларни юборишга қарор қилди.

7 январь куни Тўқаев террорчилар, жумладан, хориждан келганлар ҳам қаршилик кўрсатишда давом этаётганини айтиб, қуролини ташламаганларни йўқ қилишга ваъда берди. Бундан ташқари, Президент фуқароларнинг тинч шаклда билдирилган барча талаблари тингланганини таъкидлади. 

13 январь куни КХШТ миссияси муваффақиятли якунлангани эълон қилинди. 19 январь куни Қозоғистон Мудофаа вазирлиги Республикада хорижлик ҳарбий хизматчилар қолмаганини очиқлади.