Тўқаев Қозоғистонда келин ўғирлашга қарши чиқди

Қозоғистон Президенти Қосим-Жомарт Тўқаев Чимкентдаги шов-шувли қотилликка изоҳ бериб, сталкинг (таъқиб қилиш), шунингдек, келин ўғирлаш билан боғлиқ жиноятларни ёввойи деб атади. Президентнинг сўзларига кўра, бундай жиноятлар миллат обрўсига путур етказади. Бу ҳақда у бугун, 20 январь куни Қизилўрдада бўлиб ўтган Миллий қурултойнинг V йиғилишидаги чиқиши чоғида айтиб ўтди.

“Келинни ўғирлаш инсонни ўғирлашдир. Бу миллатимиз обрўсига путур етказадиган қўпол, ваҳшиёна жиноятдир. Бундай шафқатсизликка ҳеч қандай шароитда йўл қўйиб бўлмайди”, дейди у.

Жамоатчилик норозилиги туфайли Тўқаев Ички ишлар вазирлиги ва Бош прокуратурага Чимкентдаги полиция ишини текширишни буюрди ва қотиллик бутун мамлакатни ларзага келтирганини таъкидлади. 

21 ёшли талаба қиз Нурай Серикбай 11 январь куни Чимкентда ўлик ҳолда топилди. Республика ОАВ маълумотларига кўра, аёлни ўлдиришда гумон қилиниб, унинг таниши қўлга олинган, у аввалроқ аёлни таъқиб қилган. Тўқаев ўз нутқида гумонланувчи томонидан талабани мунтазам равишда таъқиб қилиш, шунингдек, таҳдид қилиш факти аниқланганини айтди.

Аввалроқ Тўқаев аёлларга қарши жиноятлар ҳақида гапирган эди, 2024 йилда у республикада келин ўғирлашга уринишларни “даҳшатли жаҳолат” деб атаган эди. 2025 йилда Қозоғистонда қонунларга ўзгартиришлар киритилди, унга кўра сталкинг – зўравонликсиз таъқиб қилиш учун суд 200 соатгача жамоат ишлари ёки 50 суткагача қамоқ жазосини тайинлаши мумкин. Шунингдек, Жиноят кодексига никоҳ тузишга мажбурлаш учун 10 йилгача озодликдан маҳрум қилиш жазоси тайинланиши мумкин бўлган модда киритилди.