“Тугатилишимизни барвақт нишонлашмоқда”. “Озодлик радиоси” USAGM'ни судга берди

“Озодлик радиоси” АҚШ Глобал медиа агентлиги (USAGM) ва унинг икки амалдорига қарши даъво қўзғатди. Бу ҳақда “Озодлик радиоси” хабар берди.
 
Қайд этилишича, даъводa АҚШ Глобал медиа агентлигининг Конгресс томонидан нашр учун ажратилган маблағларни беришни рад этиши федерал қонунларни, жумладан, АҚШ Конституциясини бузиши айтилади. Чунки Конституцияга кўра, федерал маблағлар устидан назорат қилиш ҳуқуқи фақат Конгрессга тегишли.

Маълум қилинишича, иш АҚШнинг Колумбия округи федерал судида кўриб чиқилади. “Озодлик радиоси” президенти ва бош директори Стивен Капус бу борада изоҳ бериб, ҳозир “Америка душманлари пропагандаси ва цензурасига йўл бериш вақти эмас”лигини таъкидлаган.

“Қонун бизнинг тарафимизда ва бизнинг тугатилишимизни дунё бўйлаб авторитар режимлар барвақт нишонламоқда”, дейди у.

Эслатиб ўтамиз, жорий йилнинг 16 март куни Дональд Трамп маъмурияти АҚШ ташқарисидаги аудиторияга мўлжалланган оммавий ахборот воситалари, жумладан, “Америка овози” (Voice of America) ва “Озодлик радиоси” ходимларини ишдан бўшатганди. Бу ҳақда журналистларга электрон почта орқали хабар берилиб, уларга идорага кириш тақиқлангани ва хизмат гувоҳномалари ҳамда ускуналарини топширишлари лозимлиги айтилган.

Трамп 14 март куни ҳукуматга қарашли еттита мустақил федерал агентлик штатларини қисқартириш ҳақида фармон имзолаган. Бу ўзгаришлар, жумладан, қуйидаги ташкилотларга таъсир қилган:

• АҚШнинг Глобал медиа агентлиги (USAGM)
• АҚШ Халқаро тараққиёт агентлиги (USAID)
• АҚШнинг Музей ва кутубхоналар хизматлари институти (IMLS)