“Озодлик” рус тилидаги эшиттиришларини тўхтатди

Кеча, 15 апрелдан бошлаб “Озодлик радиоси”нинг рус тилидаги дастурларини ўрта тўлқинли 1386 kHz частотада эфирга узатиш тўхтатилди. Бу ҳақда радиостанциянинг расмий сайтида хабар берилди.  

“Озодлик радиоси” лойиҳасининг ҳуқуқий вакили – АҚШ Конгресси томонидан АҚШ Глобал медиа агентлиги (USAGM) орқали молиялаштириладиган Radio Free Europe/Radio Liberty (RFE/RL) ҳисобланади. Мазкур радиостанция 1950 йилда иш бошлаган, рус тилидаги эшиттиришлари эса илк бор 1953 йил 1 март куни Шарқий ва Жануби-Шарқий Европага йўналтирилган ҳолда эфирга узатилган. Ўрта тўлқиндаги эшиттиришлар одатда кечки ва тунги соатларда ҳамкор радиостанциялар орқали амалга оширилган. RFE/RL штаб-квартираси Чехиянинг Прага шаҳрида жойлашган. 

Эслатиб ўтамиз, 14 март куни АҚШ Президенти Дональд Трамп етти федерал агентлик, жумладан USAGM’ни қайта тузиш ҳақидаги фармонни имзолаганди. Шундан сўнг, RFE/RL’га АҚШ ҳукумати томонидан ажратиладиган грант маблағлари тўхтатилиши ҳақида расмий билдиришнома юборилган.

USAGM сайтида агентлик раҳбари вазифасини бажарувчининг маслаҳатчиси Кэри Лейк номидан эълон қилинган баёнотда Трамп маъмурияти АҚШ солиқ тўловчиларининг маблағлари “самарасиз сарфланаётгани” сабабли молиялаштиришни тўхтатишга қарор қилгани билдирилган эди. “USA Today” нашрига кўра, бу қарор бутун дунё бўйлаб 3,5 минг нафар ходим фаолиятига таъсир қилиши мумкин.

Аммо март ойи охирида USAGM молиялаштиришни тўхтатиш ҳақидаги қарорини бекор қилгани хабар қилинди. Шунга қарамай, орадан кўп ўтмай, агентлик RFE/RL таркибидаги “Настоящее время” телеканали 24 соатлик узатмаларини амалга ошираётган Astra ва Eutelsat сунъий йўлдош операторлари билан шартномаларни бекор қилди.