Трампнинг сабри тугади – АҚШ элчиси

АҚШнинг Туркиядаги элчиси Томас Баракнинг айтишича, АҚШ Президенти Дональд Трампнинг Украина можароси борасида сабр-тоқати тугаган. Бу ҳақда у Туркиянинг NTV телеканалига берган интервьюсида сўз очди.

Баракдан Туркия Президенти Ражаб Тойиб Эрдўғаннинг ташаббуси билан Россия, Украина, Трамп ва Эрдўғаннинг иштирокида тўрт томонлама учрашув ўтказилиши мумкинми, деган савол сўралган. Элчи бу борада АҚШ Президенти номидан гапира олмаслигини таъкидлаб, агар учрашув ўтказилса, у мазмунли бўлиши, самарали қарорлар қабул қилиниши ва хавфсизлик кафолатланишини айтган. Унинг фикрича, можарони тартибга солишда икки томон билан алоқада бўлган Туркия муҳим роль ўйнаяпти ва ечим топиш учун керакли масалаларни аниқлашда ёрдам бера олади.

Баракнинг айтишича, Трампни сабрли инсон деб бўлмайди ва ҳозирда унинг сабри тугаган.

“Туркия оператив муаммоларни бартараф этаётган бир пайтда, етакчиларнинг олий даражадаги учрашуви ўтказилиши мумкин. Менимча, бу муаммони барча томонлар учун ҳал қилиш мумкин”, деган элчи.

Оқ уйнинг маълум қилишича, Эрдўғаннинг таклифидан кейин Трамп Россия ва Украина етакчилари билан учрашишга очиқ, агар бу зарур бўлса. Бироқ АҚШ томони тўғридан тўғри музокараларни афзал кўради. Май ойи бошида АҚШ Давлат департаменти воситачилик ролидан воз кечганини эълон қилган эди. Кремль эса, агар делегациялар ўзаро келишувга эришса, Путин ва Зеленский учрашувини истисно этмаслигини билдирган.

Истанбулдаги музокаралар

Жорий йилнинг 2 июнь куни Истанбулда Россия ва Украина ўртасида тўғридан-тўғри музокараларнинг иккинчи босқичи бўлиб ўтди. Музокаралар 16 майда уч йилдан ортиқ танаффусдан сўнг қайта тикланган. Томонлар тинчликка эришиш бўйича меморандум лойиҳаларини алмашди. Россия ҳужжатида 30 кунлик ўт очишни тўхтатиш йўллари кўзда тутилган, Украина эса ҳужжатни ўрганиш учун вақт сўраган.

Шунингдек, тарафлар оғир ярадор ва ёш ҳарбий асирлар алмашинуви бўйича келишган. Ҳар бир томон мингдан кам бўлмаган асирни топширади.

Россия, шунингдек, бир томонлама тарзда 6 минг нафар ҳалок бўлган украин ҳарбийсининг жасадини топширишга ваъда берган. Украина делегацияси раҳбари, Мудофаа вазири Рустам Умаров ҳам жасадлар “6000 га 6000” нисбатида алмашилишини маълум қилган. Украиналик болаларни қайтариш масаласи ҳам муҳокама қилинган.

Бундан ташқари, Россия жанг майдонида ҳалок бўлган аскарлар жасадини йиғиб олиш учун 2-3 кунлик ўт очишни тўхтатишни таклиф этган. Россия делегацияси раҳбари Владимир Мединский буни об-ҳаво иссиқлиги ва эпидемиялар хавфи билан изоҳлаган. Зеленский эса бундай таклифни танқид қилиб, “ўлмаслик учун ўт очишни тўхтатиш керак” деган.

Хуллас, Москва ва Анқара кеча бўлиб ўтган музокараларнинг иккинчи босқичини ижобий баҳолади. Киев учинчи босқич учрашувини июнь ойи охиригача ўтказишни таклиф қилмоқда.