Трампнинг рейтинги рекорд даражада пастлади

АҚШ Президенти Дональд Трампнинг фаолиятини қўллаб-қувватловчи америкаликлар улуши рекорд даражада пасайиб, 33 фоизни ташкил этди. Республикачилар орасида ҳам унинг қўллаб-қувватлаш даражаси 72 фоизга тушди. Бу ҳақда “Finanсial Times” хабар берди.

Қайд этилишича, сўровда қатнашганларнинг қарийб учдан икки қисми АҚШ иқтисодиёти нотўғри йўналишда ҳаракатланаётганини билдирган. Респондентларнинг 57 фоизи эса Дональд Трамп президентлиги даврида молиявий аҳволи ёмонлашганини айтган.

Президентнинг иқтисодий сиёсатини қўллаб-қувватлаётган республикачилар улуши ҳам бир ой аввалги кўрсаткичга нисбатан қарийб 8 фоиз пунктга камайиб, 53 фоизни ташкил этган.

Оқ уйнинг савдо сиёсати ҳам сайловчилар орасида норозилик уйғотмоқда. Канада товарларига 50 фоизлик бож жорий этилишини сўралганларнинг 56 фоизи қўллаб-қувватламаган. Бу чорага мустақил сайловчиларнинг 60 фоизи ва республикачиларнинг қарийб учдан бир қисми ҳам қарши чиққан.

Трамп рейтингидаги пасайиш Конгрессга оралиқ сайловларига икки ойдан кам вақт қолган пайтга тўғри келмоқда. Тадқиқот иштирокчиларининг қарийб 46 фоизи президентнинг сайлов кампаниясида фаол иштирок этиши республикачи номзодларнинг имкониятларини мураккаблаштиришини айтган.

АҚШда оралиқ сайловлар жорий йилнинг 3 ноябрь куни ўтказилади. Унда Вакиллар палатасининг барча 435 ўрни ҳамда Сенатдаги ўринларнинг тахминан учдан бир қисми учун сайлов бўлиб ўтади.

Айни пайтда Конгресснинг ҳар икки палатасида республикачилар кўпчиликни ташкил этади. Сайлов натижалари Дональд Трамп президентлик муддатининг сўнгги икки йилида сиёсий кучлар нисбатини белгилаб беради.

Эслатиб ўтамиз, аввалроқ АҚШ федерал судьяси Дональд Трамп маъмуриятининг туғилиш орқали фуқаролик олиш ҳуқуқини чеклашга қаратилган янги фармони ижросини тўхтатганди.