Трампнинг Путинга нисбатан сабри тугаяпти – Стубб

Финляндия Президенти Александр Стуббнинг айтишича, АҚШ Президенти Дональд Трампнинг Россия раҳбари Владимир Путинга нисбатан сабри тугаш арафасида. Бу ҳақда у “Yle” телеканалига берган интервьюсида сўз очди.

Стуббнинг сўзларига кўра, Трампнинг сабрини тугатиши мумкин бўлган икки омил бор. Биринчиси – вақт, яъни музокаралар жараёнининг чўзилиши. Финляндия Президенти бу борада Москванинг ҳаракати ўзаро зид эканини таъкидлаган. У мисол сифатида Россия Ташқи ишлар вазири Сергей Лавровнинг баёнотини келтирган. Лавровга кўра, Путин Зеленский билан учрашишга тайёр, бироқ бу фақат “президентлик кун тартиби” пайдо бўлгандагина мумкин, ҳозирча эса бундай кун тартиби йўқ.

Иккинчи сабаб – давом этаётган ҳужумлар. Стуббнинг фикрича, Путиннинг Зеленский билан яқин бир ярим ҳафта ичида учрашиши эҳтимолдан йироқ, шунда Трампнинг сабри бутунлай тугаши мумкин.

Таъкидлаш жоизки, Оқ уйда Зеленский ва Европа етакчилари, жумладан Стубб иштирокида бўлиб ўтган саммит якунида Трамп Россия ва Украина Президентлари учрашувига тайёргарлик бошланишини эълон қилган эди. Унга кўра, аввало Путин ва Зеленский юзма-юз учрашиши лозим, кейин эса Трампнинг ҳам қўшилиши билан уч томонлама учрашув ўтказилиши мумкин.

22 август куни Трамп агар икки ҳафта ичида Россия ва Украина етакчилари музокараларга қайтмаса, “жуда муҳим қарор” қабул қилишини айтди. Бу қарор йирик санкциялар, божлар ёки уларнинг иккаласи бўлиши мумкин, ҳатто АҚШ умуман ҳеч нарса қилмаслиги эҳтимоли ҳам борлигини қўшимча қилган.

Эслатиб ўтамиз, аввалроқ Украина Ташқи ишлар вазирининг биринчи ўринбосари Сергей Кислица NBC News телеканалига берган интервьюсида Владимир Зеленский Россия раҳбари Владимир Путин билан ҳудудий масалаларни муҳокама қилишга тайёрлигини айтганди. Унинг айтишича, Зеленский бу масалада Украина қонунчилигига ҳам, жамоатчилик фикрига ҳам асосланади. Шу билан бирга, Украина жамияти “ер эвазига тинчлик”га қатъий қарши.