Трампнинг одами Путин билан нимани гаплашди?

Россия Президенти Владимир Путин ва АҚШ Президентининг махсус элчиси Стив Уиткоффнинг Санкт-Петербургдаги учрашуви каби алоқалар фойдали ва самарали. Бу ҳақда Россия Президенти матбуот котиби Дмитрий Песков маълум қилди. 

Унинг сўзларига кўра, бундай музокаралар Америка ва Россия раҳбарларига ахборотни “биринчи қўлдан” олиш имконини беради. Кремл вакилининг айтишича, Стив Уиткофф билан музокараларда Владимир Путин ва Дональд Трампнинг эҳтимолий учрашуви батафсил муҳокама қилинмаган.

“Учрашув мавзуси батафсил муҳокама қилинмади, чунки ҳар қандай учрашувга, албатта, пухта тайёргарлик кўриш керак”, деди Песков.

Журналистларнинг Владимир Путин ва Стив Уиткофф ўртасидаги музокаралардан сўнг Россия ва АҚШ позициялари яқинлашиб қолдими, деган саволига Дмитрий Песков шундай жавоб берди:

“Муҳокама қилинаётган масалалар жуда ва жуда мураккаб, шунинг учун бирон бир зудлик билан натижа кутишни оқлаб бўлмайди. Иш давом этмоқда”.

Шу билан бирга, у томонлар “бир-бирига маълумот узатиш учун жуда зарур канал” топилганини таъкидлади.

“Муайян масалалар бўйича позициянинг турли элементларини давлат раҳбаридан етказиш мумкин бўлган канал, бу, албатта, ҳамкасбларнинг маълумотни биринчи қўлдан олишини таъминлашга ёрдам беради”, деди Кремль вакили.

Владимир Путин ва Стив Уиткофф ўртасидаги учрашув 11 апрель куни Санкт-Петербургда Президент кутубхонаси биносида бўлиб ўтди. Музокаралардан сўнг Дмитрий Песков учрашув тафсилотлари сир сақланишини айтди. Шу билан бирга, у Россия Президенти ва АҚШ Президентининг махсус вакили Россия-Украина можаросини тартибга солишни муҳокама қилганини билдирди.

Оқ уй эса Уиткоффнинг Россияга ташрифини Украинада тинчликка эришиш йўлидаги қадам деб атади.