Трампнинг одами Москвада Путин билан узоқ гаплашгани маълум бўлди

АҚШ Президенти Дональд Трампнинг махсус вакили Стивен Уиткофф Россия қамоқхонасида сақланган Америка фуқароси Марк Фогелни ватанига қайтариш учун Москвага борганини маълум қилди. Бу ҳақда у Флорида штатининг Майами шаҳрида бўлиб ўтган сармоявий форумдаги чиқишида маълум қилди.

Унинг айтишича, ўша куни у Россия Президенти Владимир Путин билан учрашган, у билан узоқ суҳбатлашган ва дўстона муносабатларни ривожлантиришга интилган.

“Бу ажойиб саёҳат эди. Мен Президент Путин билан узоқ суҳбатлашдим, у билан муносабатларни ривожлантирдим. Буларнинг барчаси Марк Фогелнинг самолётга чиқишига олиб келди. Ташриф, биринчидан, Президент Трампнинг қўллаб-қувватлаши, бу ўз-ўзидан муҳим, иккинчидан, Саудия Арабистони валиаҳд шаҳзодаси Муҳаммад бин Салмон Ол Сауд ҳамда Саудиянинг АҚШдаги элчиси, Саудия томони билан мукаммал муносабатларимиз туфайли амалга оширилди. Улар бизни бу мумкинлигига ишонтиришди. Бу Фогелнинг қайтиши мумкинлигининг ҳақиқий тасдиғи эди. Шунинг учун мен Москва ташриф буюришга арзишини англадим”, деди Уиткофф Саудия Арабистони мезбонлик қилган форумда.

11 февраль куни Россияда гиёҳванд моддалар контрабандасида айбланиб қамоқ жазосини ўтаётган Фогель озодликка чиқди. Трампнинг миллий хавфсизлик бўйича маслаҳатчиси Майк Уолтц буни Москванинг Украинадаги инқирозни ҳал қилишда олға силжишдан дарак берувчи хайрихоҳлик ҳаракати деб атади. Фогель Уиткофф билан Москвани тарк этди.

Трампнинг айтишича, Қўшма Штатлар ўз фуқаросини Россия расмийлари томонидан озод этилганини юксак қадрлайди.

13 февраль куни Америка қамоқхонасидан чиққан Россия фуқароси Александр Винник АҚШдан Россияга қайтиб келди. У Путинга ва унинг қайтишида меҳнат қилган барчага миннатдорлик билдирди. Кремль маҳбуслар алмашинувини Вашингтон билан ўзаро ишончни ошириш йўлидаги қадам деб атади.