“Трампнинг бунга ваколати йўқ”. АҚШ Конгресси божларни бекор қилиши мумкин

АҚШ Конгресси кўпчилик овоз билан Президент Дональд Трамп жорий қилган фавқулодда ҳолат режими ва шу билан унинг импорт божлари тўғрисидаги қарорини бекор қилиши мумкин. Бу ҳақда сенатор Элизабет Уоррен  MSNBS телеканалига берган интервьюсида сўз очди. 

Унинг айтишича, тарифлар тўғрисидаги қарорни Президент эмас, балки Конгресс қабул қилиши ва тасдиқлаши керак.

“Аслида Конгресс тарифларни жорий этиш тўғрисидаги қарорни тасдиқлаши керак. Конгресс Дональд Трампга фавқулодда ваколатлар берди, аммо у оддий кўпчилик овоз билан фавқулодда вазият йўқлигини эълон қилишга ҳақли холос. Бу эса уни ушбу тарифларнинг барчасини жорий этиш имкониятидан маҳрум қилади”, деган сенатор.

Унинг қўшимча қилишича, барча демократлар АҚШ фавқулодда ҳолатда эмаслигини эълон қилишга тайёр.

“Биз Франция, Канада, Италия, Япония ёки Жанубий Корея билан урушмаяпмиз. Агар бир нечта республикачилар бизни қўллаб-қувватласа, Дональд Трамп томонидан яратилаётган ва иқтисодиётимизни жарликка тортаётган бу тариф фалокатига чек қўйиш учун етарлича кучга эга бўламиз”, деган сенатор.

Трампнинг янги божлари

2 апрель куни Трамп АҚШнинг ташқи савдо ҳамкорларига (рўйхатга жами 185 та давлат киритилган) нисбатан “ўзаро” божлар жорий этилишини маълум қилди. Божларнинг минимал базавий даражаси 10 фоизни ташкил этди, бироқ бир қатор давлатлар учун божлар АҚШнинг ушбу мамлакатлар билан савдо тақчиллигига қараб индивидуал равишда ҳисоблаб чиқилган. Масалан, Хитой учун божлар 34 фоизни, Европа Иттифоқи учун эса 20 фоизни ташкил қилади.

7 апрель куни Трамп, агар Пекин Америка товарларига нисбатан 34 фоизлик жавоб божларини бекор қилмаса, АҚШ маъмурияти Хитойга қўшимча 50 фоизлик бож жорий этишини эълон қилди. У бундай мажбуриятлар 9 апрелдан бошлаб кучга кириши ҳақида огоҳлантирди.

Бунга жавобан Хитой Трамп билан савдо урушида охиригача курашишга тайёрлигини билдирди. Қолаверса, АҚШ Ҳукумат самарадорлиги департаменти (DOGE) раҳбари, бизнесмен Илон Маск ҳам шахсан АҚШ Президенти Дональд Трампдан божхона сиёсатини қайта кўриб чиқишни ва улкан импорт божларини жорий қилмасликни сўраганди.