Трампни “қўрқоқ” деган собиқ вице-президент вафот этди

АҚШнинг собиқ вице-президент Дик Чейни 84 ёшида вафот этди. Бу ҳақда унинг оиласига таяниб, кеча, 4 ноябрь куни CNN хабар берди.

Қайд этилишича, сиёсатчининг ўлимига пневмония ва юрак-қон томир касалликлари туфайли юзага келган асоратлар сабаб бўлган. Собиқ вице-президентнинг қариндошларининг маълум қилишича, Дик Чейни вафот этган пайтда 61 йилдан бери бирга яшаган рафиқаси, шунингдек, қизлари Лиз ва Мери ҳамда бошқа оила аъзолари унинг ёнида бўлган.

Маълумот учун, у 2001 йил январидан 2009 йил январигача Жорж Буш администрациясида АҚШ вице-президенти лавозимида ишлаган. Шунингдек, Чейни икки марта вақтинча президент вазифасини бажарган. 2001 йил 11 сентябрдаги террор ҳужумларига нисбатан кескин муносабати билан танилган. Айнан шу воқеалардан сўнг АҚШ Яқин Шарқда янги урушларни бошлаган.

Республикачилар партияси аъзоси сифатида Дик Чейни ҳозирги Президент Дональд Трампни кескин танқид қилиб, уни “қўрқоқ” ва “давлат учун энг катта таҳдид” деб атаган.

Эслатиб ўтамиз, аввалроқ Аргентинанинг Мисьонес провинцияси парламентига номзод бўлган 66 ёшли сиёсатчи Эрнан Дамиани жонли эфир пайтида юрак хуружидан вафот этганди.