Делcи Родригес Венесуэланинг муваққат президенти сифатида қасамёд қилди (видео)

Венесуэла Президенти Николас Мадуро қўлга олинганидан сўнг унинг ўрнини вақтинча эгаллаб турган вице-президент Делcи Родригес бугун, 6 январь соат 02:00 лар атрофида мамлакатнинг муваққат президенти сифатида расман қасамёд қилди. Бу ҳақда “Reuters” хабар берди.

Маълум қилинишича, вице-президент Делcи Родригес Каракасда, АҚШ Венесуэлага зарба бериб, Президент Николас Мадуро ва унинг рафиқаси Силия Флоресни қўлга олганидан сўнг, Миллий Ассамблеяда Венесуэланинг вақтинча президенти сифатида қасамёд маросимида қатнашган.

Меҳнат ҳуқуқи бўйича адвокат бўлган, хусусий сектор билан яқин алоқалари ва ҳукмрон партияга садоқати билан танилган 56 ёшли Родригесга қасамёдни унинг акаси – Миллий Ассамблея раиси Хорхе Родригес қабул қилдирган. 

Қайд этилишича, 2025 йил май ойида бўлиб ўтган сайловларда мандат олган 283 нафар депутат ҳам қасамёд маросимида иштирок этган. Уларнинг фақат оз қисми мухолифат вакиллари ҳисобланади – мухолифатнинг асосий қисми, хусусан Нобель мукофоти совриндори Мачадо етакчилигидаги қанот сайловларни бойкот қилган. Маросимда қатнашмаган ягона депутат биринчи хоним Силия Флорес бўлди. 

Эслатиб ўтамиз, аввалроқ Николас Мадуро ва унинг рафиқаси Нью-Йорк судида иштирок этиб, ўзларига қўйилган айбловларни тан олмасликларини маълум қилган эди.