Трампни “фаластинлик” сўзини ҳақорат сифатида ишлатганликда айблашди

АҚШнинг мусулмон ва яҳудий жамоат ташкилотлари мамлакат Президенти Дональд Трампни “фаластинлик” сўзини ҳақорат сифатида ишлатганликда айблади. Бу ҳақда “The Guardian” хабар берди.

Қайд этилишича, Трамп журналистлар билан учрашувда конгрессменлар олдидаги нутқига салбий муносабат билдиргани учун АҚШ Сенатидаги Демократик партия етакчиси Чак Шумерни танқид қилган.

“Менинг билишимча, Шумер – фаластинлик. У фаластинлик бўлди. Илгари у яҳудий эди, энди у яҳудий эмас, у фаластинлик”, деб айтган Трамп журналистларга.

АҚШнинг энг йирик яҳудий инсон ҳуқуқлари ташкилоти – Туҳматга қарши кураш лигаси (ADL) танқидий баёнот бериб, АҚШ Президентининг ваколатлари унга “ким яҳудий ва ким яҳудий эмаслигини” аниқлаш ҳуқуқини бермаслигини таъкидлаган.

Қолаверса, мамлакатдаги энг йирик мусулмон нодавлат ташкилоти бўлган Америка-Ислом муносабатлари кенгаши (CAIR) ҳам Трампнинг сўзларини қоралаб, у фаластинликларни четга суриб қўйганини таъкидлаган ва Президентни кечирим сўрашга чақирган.

“Президент Трампнинг “фаластинлик” атамасини ирқий ҳақорат сифатида қўллаши ғазаблантиради ва ўз лавозими шаънига тўғри келмайди,” деган ташкилот раҳбари.

Шунингдек, Трампни америкалик мусулмонлар ва яҳудийларнинг бошқа йирик жамоат бирлашмалари ҳам танқид қилган.

Эслатиб ўтамиз, аввалроқ  Фаластиннинг ҲАМАС ҳаракати вакили Ҳазим Қосим “Анадолу”га берган интервьюсида АҚШ Президенти Дональд Трампнинг сўнгги баёнотлари Ғазо секторида ўт очишни тўхтатиш бўйича келишувни амалга ошириш ва асирларни алмашиш билан боғлиқ вазиятни сезиларли даражада мураккаблаштириши мумкинлиги ҳақида гапирганди.