Трамп Ғазодаги келишувни чигаллаштирмоқда – ҲАМАС

north_east

Миср Ғазони қайта қуриш учун нималарни режа қилмоқда?

north_east

АҚШ ҲАМАС билан музокара олиб бормоқда – “Axios”

АҚШ Президенти Дональд Трампнинг сўнгги баёнотлари Ғазо секторида ўт очишни тўхтатиш бўйича келишувни амалга ошириш ва асирларни алмашиш билан боғлиқ вазиятни сезиларли даражада мураккаблаштириши мумкин. Бу ҳақда Фаластиннинг ҲАМАС ҳаракати вакили Ҳазим Қосим “Анадолу”га маълум қилди.

Унинг сўзларига кўра, Оқ уй раҳбарининг таҳдидлари Исроил томонини келишувга риоя қилмасликка ундамоқда. ҲАМАС вакили Фаластин ҳаракати биринчи босқичнинг барча шартларини бажарганини, Исроил эса иккинчи босқични бошлашдан қочаётганини қайд этди.

“Қўшма Штатлар келишувга воситачилик қилган давлатлардан бири. Битим барча маҳбусларни уч босқичда озод қилишни кўзда тутади ва ҲАМАС биринчи босқич бўйича ўз мажбуриятларини бажарди”, деди Қосим.

У Вашингтонни Исроилни аввал эришилган келишувларга мувофиқ келишувнинг иккинчи босқичи бўйича музокараларга ўтишга мажбурлаш учун босим ўтказишга чақирди.

Маълумот учун, январь ойи ўрталарида Исроил ва ҲАМАС Миср, Қатар ва АҚШ воситачилигида Ғазода ўт очишни тўхтатиш режимини жорий этишга келишиб олди ва бу келишув 19 январдан кучга кирди. Келишувни амалга оширишнинг биринчи босқичи 1 март куни якунланди.

Келишувнинг биринчи босқичида барча исроиллик гаровга олинганлар ва ҳалок бўлганларнинг жасадлари ўз ватанларига қайтарилди. Бунинг эвазига Исроил 1500 дан ортиқ фаластинликни қамоқдан озод қилди, уларнинг бир қисми Фаластин ҳудудидан чиқариб юборилди.

2 март куни Исроил Ғазога инсонпарварлик ёрдами етказилишини тўсиб қўйди ва буни ҲАМАСнинг анклавда ўт очишни тўхтатиш бўйича музокараларни давом эттириш бўйича Уиткофф режасини қабул қилишдан бош тортгани билан изоҳлади.

Эслатиб ўтамиз, аввалроқ АҚШ Президенти Дональд Трамп ҲАМАСга “якуний огоҳлантириш” бериб, Ғазо секторида сақланаётган барча маҳбусларни зудлик билан озод этиш ва эксклавни олиб чиқишни талаб қилган эди.

“Барча гаровга олинганларни ҳозироқ озод қилинг, кейинроқ эмас ва ўлдирган одамларнинг жасадларини дарҳол қайтаринг, акс ҳолда ҳаммаси тугайди. Мен Исроилга ишни тугатиш учун керак бўлган ҳамма нарсани юборяпман, агар сиз айтганимни қилмасангиз, ҲАМАС аъзолари хавфсиз бўлмайди”, деб ёзди Америка етакчиси ўзининг Truth Social ижтимоий тармоғидаги саҳифасида.