Трампга FIFA‘нинг биринчи тинчлик мукофоти топширилди (видео)

Кеча, 5 декабрь куни Вашингтонда бўлиб ўтган 2026 йилги жаҳон чемпионати қуръа ташлаш маросими доирасида АҚШ Президенти Дональд Трампга Халқаро футбол федерацияси (FIFA)нинг янги жорий этилган Тинчлик мукофоти топширилди.

Маросим чоғида мукофот – олтин глобус – Трампга FIFA раҳбари Жанни Инфантино томонидан олтин медаль ва сертификат билан бирга тақдим этилди. Инфантино Трампни “дунё бўйлаб тинчлик учун қатьий саъй-ҳаракатлари” учун мақтаб, унинг “тинчлик ишига мустаҳкам садоқати”ни таъкидлади. Трамп эса буни “ҳаётимдаги энг юксак шарафлардан бири” деб атади. Унинг сўзларига кўра, у “Конгода миллионлаб одамларнинг ҳаётини сақлаб қолган ва кўплаб мамлакатларда урушларни тўхтатган ёки олдини олган”.

SID агентлигининг ёзишича, Инфантино бу мукофотни бор-йўғи бир ой аввал таъсис этган. FIFA сайтига кўра, бу мукофот мунтазам тарзда берилувчи анъанага айланади ва “дунёда тинчлик йўлида фавқулодда ва битмас-туганмас ишлар қилган ва шу орқали бутун дунё одамларини бирлаштирган шахсларга” топширилади. Мукофотни жорий этиш қарори FIFA Кенгаши розилигисиз қабул қилингани ва бу улар учун кутилмаган ҳол бўлгани қайд этилади.

Аввалроқ, Жанни Инфантино ўзининг “дўсти” Дональд Трампни Нобель Тинчлик мукофотига ҳам тақдим этган, лекин бу муваффақиятсиз якунланди. У Instagram саҳифасида Трампни “Исроил ва ҲАМАС ўртасидаги оташкесимга эришишда ҳал қилувчи ҳаракатлари” учун мукофотга лойиқ деб ёзган эди.

Трамп Нобель мукофотига даъвогар бўлган, аммо октябрда номзодлар рўйхатига киритилмаган. Мукофот венесуэлалик фаол Мария Корина Мачадога берилди. Натижалар эълон қилингач, Оқ уй Нобель қўмитасини “партиявий манфаатларни тинчликдан устун қўйишда” айблади.

Июль ойида Инфантино АҚШ Президентига АҚШда ўтказилган Клублар ўртасидаги жаҳон чемпионатининг ҳақиқий бош совғини тақдим этган, ғолиб – Лондоннинг “Челси” жамоаси эса кейинчалик фақат унинг нусхасини олган. Трамп бу ҳақда: 

“Бироз ҳаяжонли эди, аммо у ҳозир Оваль офисда турибди”,  деган эди.

13 июль куни Нью-Жерсидаги “Мет Лайф” стадионида КЧМ финалида “Челси”нинг “Пари Сен-Жермен”ни 3:0 ҳисобида мағлуб этганидан сўнг, саҳнага мукофотлаш маросимига Дональд Трамп тушди. Лекин мукофотлар топширилгандан сўнг кетмай, ўйинчилар билан фотосессияда қолиб кетди.

Бу вазият бир қанча футболчиларда, хусусан “Челси” етакчиларидан бири Коул Палмерда ноқулайлик уйғотди. FIFA президенти бир неча марта уни саҳнадан олиб чиқишга ҳаракат қилганига қарамай, Трамп футболчиларнинг биринчи қаторида қолаверди.

Трамп шу маросим чоғида футбол ва америкча футбол атамаларини қайта номлаш ниятини билдириб, АҚШда футболнинг “soccer” деб аталиши ва NFL спортининг “football” деб номланишини “мантиқсиз” деб атади. Унинг таъкидлашича, американча футболда тўп асосан қўл билан бошқарилади, оёқ билан эмас.

“Биз NFL учун бошқа ном топишимиз керак”, деди Президент, аммо аниқ вариантлар таклиф қилмади. 

AFP агентлиги ёзишича, Трамп ёзнинг ўзида бу турларни расман қайта номлаш ва ҳатто Президент фармони билан белгилаш ҳақида ҳам ўйлаб кўрган.

Маълумот учун, футбол бўйича жаҳон чемпионати 2026 йил 11 июндан 19 июлгача Канада, АҚШ ва Мексикада бўлиб ўтади. Мусобақада илк бор 32 эмас, 48 терма жамоа қатнашади. Жаҳон чемпионатининг гуруҳ босқичига қуръа ташлаш маросимида Ўзбекистон миллий терма жамоаси Португалия, Колумбия ва Ямайка/Конго/Янги Коледония ўтиш ўйини ғолиби билан бирга “K” гуруҳидан жой олди. Ўзбекистон миллий терма жамоаси Жаҳон чемпионатини 2026 йил 17 июнь куни Колумбияга қарши баҳс билан бошлайди. Навбатдаги учрашув 23 июнь куни Роналду етакчилигидаги Португалияга қарши бўлиб ўтса, гуруҳ босқичининг сўнгги баҳси 27 июнь куни ўтиш ўйини ғолибига қарши ўтказилади. Учрашувларнинг қайси стадионларда бўлиб ўтиши бугун, 6 декабрь куни эълон қилинади.