“Трамп замонамиз Гитлери”. Ресторанга борган Президентни намойишчилар қарши олди (видео)

АҚШ Президенти Дональд Трамп кеча, 9 сентябрь куни кечқурун Оқ уй дарвозаларидан бир ярим квартал узоқликда жойлашган ресторанда кечки овқатланиш учун чиқди. Ресторанда Президент уни “замонамиз Гитлери” деб атаган намойишчилар томонидан қарши олинди. Ҳолат акс этган видеолар тармоқларда кенг тарқалмоқда.

Трамп Оқ уйдан “Joe’s Seafood, Prime Steak & Stone Crab” ресторанига юриб борди. Унинг мақсади пойтахтда жиноятчиликка қарши олиб борилаётган федерал чоралар самара бермоқда, деган фикрни уйғотиш эди. Аммо ресторан ичига кириб борар экан, намойишчилар уни ҳақоратли шиорлар билан қарши олди.

“Озод Колумбия округи (АҚШ пойтахти, Вашингтон), Озод Фаластин. Трамп замонамиз Гитлери (Free D.C., Free Palestine. Trump is the Hitler of our time )”, дея ҳайқирди қўлларида Фаластин байроғини кўтарган намойишчилар.

Трамп учун бу ташриф ғалаба нишони бўлиши керак эди. У ресторанга киришдан аввал журналистларга шундай деганди: 

“Биз Вашингтоннинг марказида турибмиз. Бу мамлакатдаги энг хавфли шаҳарлардан бири эди. Энди эса мамлакатнинг энг хавфсиз жойларидан бирига айланди”. 

Бироқ ичкарида содир бўлган ҳолат Трамп учун муваффақият эмасди. Президент намойишчилар билан шундай тўқнашиши камдан кам содир бўлади. Чунки у лавозимга киришганидан бери, асосан, Оқ уйда ёки Флорида, Вирджиния ва Нью-Жерсидеги шахсий клубларида кўп вақт ўтказган. Аммо сўнгги вақтларда Трамп жамоат жойларига кўпроқ чиқишга мойиллик кўрсатмоқда. 7 сентябрь куни у Нью-Йоркда бўлиб ўтган АҚШ Очиқ чемпионати (U.S. Open) финалида қатнашди ва у ерда уни қаршилаган оммадан ҳам ҳуштакбозлик, ҳам қўллаб-қувватлаш овозлари эшитилди. Эртага эса у 11 сентябрь ҳужумлари хотираси муносабати билан Нью-Йоркда “Yankees” ўйинига ташриф буюришни режалаштирган.

Бу Трампнинг январда Оқ уйга қайтганидан бери Вашингтондаги ресторанда биринчи марта овқатланиши эди. Биринчи президентлик даврида у Оқ уйдан яқинидаги “Trump International Hotel” меҳмонхонасига тез-тез борарди, лекин у меҳмонхона 2022 йилда ёпилган.

Кеча кечқурун Трамп билан бирга вице-президент Жеймс Дэвид Вэнс, Давлат котиби Марко Рубио, Уруш вазири Пит Ҳегсет ва Оқ уйнинг бошқа юқори амалдорлари овқатланди. Оқ уй Матбуот котиби Кэролайн Ливиттнинг айтишича, улар краб, майда баҳорий маҳсулотлар, салат, стейк ва ширинлик еган.

“Овқат ажойиб, хизмат кўрсатиш эса аъло даражада эди,” деди Ливитт хоним.

Президент Трамп ўтган ой пойтахт Вашингтонда жиноятчиликка қарши кураш доирасида Миллий гвардияни жойлаштирган эди. Оқ уй ўшандан бери “жиноятчилик бўйича фавқулодда ҳолат” эълон қилинганидан сўнг қўлга олинганларнинг сонини фахр билан эълон қилиб келмоқда. Бироқ ушбу қўлга олишларнинг кўпчилиги майда ҳуқуқбузарликлар билан боғлиқ бўлиб, Вашингтон прокуратураси айрим ишларни айблов қўя олмагани учун енгилроқ айбловга туширган, ёки умуман бекор қилган.