Трамп Европа етакчиларига Путин урушни тугатмоқчи эмаслигини айтди – WSJ

АҚШ Президенти Дональд Трамп жорий йилнинг 19 май куни Россия Президенти Владимир Путин билан бўлиб ўтган телефон суҳбатидан сўнг Европа етакчиларига Путин урушни тўхтатмоқчи эмаслигини, чунки у ғолиб бўлишга ишонишини айтган. Бу ҳақда воқеадан хабардор манбаларга таяниб, “Тhе Wall Street Journal” хабар берди.

Нашрнинг ёзишича, Трамп бу фикрни биринчи марта ошкора айтган. Европа етакчилари эса Путиннинг бундай мақсадини аллақачон тушуниб етган. Шунингдек, бу Трампнинг илгари очиқ айтган фикрларига зид келади. Чунки у илгари бир неча марта Путиннинг тинчликни чин дилдан исташига ишонишини билдирган. Бироқ ушбу тушунча Трампни Европа давлатлари ва Украина Президенти Владимир Зеленский истаган йўналишда – Россияга қарши курашни кучайтиришга ундамаган.

Нашрга кўра, Трамп Путин билан телефон суҳбати арафасида Европа етакчилари билан қўнғироқлашган ва суҳбат давомида агар Путин ўт очишни тўхтатишга рози бўлмаса, унга нисбатан санкциялар киритилиши мумкинлигини билдирган. Бироқ жорий йилнинг 19 май куни у фикрини ўзгартириб, бу режадан воз кечган ва бунинг ўрнига Россия ҳамда Украина ўртасида Ватикан ҳудудида паст даражадаги музокараларни бошлашни исташини маълум қилган.

“Шу билан бирга, Европа томони бу вазиятда маълум фойда ҳам кўрди. Энди Путиннинг позицияси барчага, жумладан Трампга ҳам равшан бўлди, яъни Россия раҳбари ҳозирча урушни тўхтатмоқчи эмас. Бу эса шуни кўрсатадики, эндиликда Украинани қўллаб-қувватлаш асосан Европанинг зиммасига тушмоқда”, дейилади хабарда.

Манбалардан бирининг билдиришича, Европа ёки Украина пул тўлашда давом этса, Трамп маъмурияти қурол-яроғ экспортини тўхтатмайди.

Бундан ташқари, Трамп энди Россия музокараларни бузса ҳам унга қарши санкциялар киритиш масаласига қизиқмаяпти. Чунки унинг асосий мақсади АҚШда бизнесни ривожлантириш ва америкаликлар учун иқтисодий имкониятларни максимал кенгайтириш бўлиб қолмоқда.

Эслатиб ўтамиз, аввалроқ Дональд Трамп Владимир Путин билан Украинадаги Россия урушини тартибга солиш масаласида телефон орқали мулоқот қилганди. Суҳбатдан сўнг Путин уни “очиқ ва мазмунли” деб атаган ва Трамп Россиянинг Украинадаги инқирозни тинч йўл билан ҳал қилишга содиқлигини тан олганини таъкидлаган. Трампнинг ўзи эса Truth Social'даги саҳифасида Путин билан суҳбат “жуда яхши” ўтгани ва унинг “оҳанги ва руҳи” “аъло даражада” эканини ёзган эди.

Жалолиддин Раҳмонов