Трамп ўзи жорий қилган божлар сабаб 500 млн долларга “камбағаллашди”

АҚШ Президенти Дональд Трампнинг бойлиги 2 апрелдан кейин – у янги савдо божларини жорий қилганидан сўнг 500 миллион долларга камайди. Бу ҳақда “Forbes” нашри хабар берди.

“Минглаб одамлар зарар кўрди, жумладан, Трампнинг ўзи ҳам. Ўтган ҳафтада Дональд Трамп глобал савдо урушида биринчи “ўқларни” отиб, ўзига ҳам зарар етказди. 2 апрель куни у кенг кўламли божлар жорий қилиш режаси ҳақида эълон қилганида “Forbes” унинг бойлигини 4,7 миллиард доллар деб баҳолаган эди. Орадан бир ҳафтадан кам вақт ўтиб, бу рақам 4,2 миллиард долларга тушди”, дейилади хабарда.

Нашр маълумотларига кўра, Трампнинг энг катта молиявий йўқотишлари Trump Media and Technology Group компаниясига тўғри келган. Ушбу компания акциялари сўнгги уч савдо кунида 8 фоизга арзонлашиб, октябрдан бери энг паст даражага тушган. Шунингдек, Трампнинг кўчмас мулк портфели қиймати 660 миллион доллардан 570 миллион долларга камайган.

Шунингдек, Трампнинг гольф маҳсулотлари ва курорт хизмати билан боғлиқ активлари ҳам зарар кўрган.

Эслатиб ўтамиз, 2 апрель оқшомида Оқ уй боғида чиқиш қилган Трамп АҚШга импорт қилинадиган маҳсулотларнинг аксарига 10 фоизлик тарифлар, Хитой учун эса қўшимча 34 фоизлик, Европа Иттифоқи учун эса 20 фоизлик божлар жорий этилишини эълон қилди. Оқибатда АҚШнинг импорт бўйича ўртача бож ставкаси 2024 йилдаги 2,5 фоиздан 22 фоизга ошди – бу кўрсаткич охирги марта 1910 йиллар атрофида кузатилган.

Шундан сўнг, 3 апрель кунги савдо бошида S&P 500 индекси 4 фоиздан кўпроққа, Nasdaq – 4,9 фоиз, Dow Jones – 3,7 фоизга, кичик капитализацияли компанияларни ўз ичига олган Русселл 2000 индекси эса деярли 7 фоизга қулади. Apple акциялари ҳам 9,5 фоизга тушиб кетди.

Осиё-Тинч океани минтақаси фонд бозорлари ўтган ҳафта АҚШ Президенти Дональд Трамп томонидан эълон қилинган тарифларга жавобан шиддат билан пасайишда давом этмоқда. Тинч океани минтақасининг 13 мамлакатидан йирик ва ўрта капиталлашувга эга компанияларни ўз ичига олган MSCI Asia Pacific индекси 2008 йилдан бери энг кучли пасайишни кўрсатган (-7,1 фоиз), Япониянинг Nikkei 225 эса “айиқ бозори” зонасига кирган - яъни аввалги максимал кўрсаткичдан 20 фоиз ёки ундан кўпроққа пасайган.