Трамп учинчи бор президентликка номзодини қўймоқчи

АҚШ Президенти Дональд Трамп яна бир муддатга президентликка сайланиш имкониятини кўриб чиқаётганини таъкидлади. Бу ҳақда у бугун, 28 февраль куни Техас штатининг Корпус Кристи шаҳрида ўтказилган учрашув чоғида, тарафдорлари олдида сўзлаган нутқида маълум қилди.

Митингда бир неча минг тарафдорлари олдида чиқиш қилган Трамп учинчи муддат масаласига тўхталиб, конституциядаги чекловларга қарамай, бундай имконият борлигини таъкидлаган. 

“Балки биз яна бир муддатга сайланармиз”, деган у йиғилганларга мурожаат қилар экан.

Маълумки, 1951 йилда қабул қилинган АҚШ Конституциясига киритилган 22-тузатишга кўра, бир шахс икки мартадан ортиқ Президент этиб сайланиши мумкин эмас. Ушбу тузатиш Франклин Рузвелт тўрт муддат Президент бўлганидан сўнг жорий этилган бўлиб, президентлик ваколатини икки муддат билан чеклайди.

Маълумот учун, Дональд Трамп илк бор 2017–2021 йилларда АҚШ Президенти лавозимида фаолият юритган. У 2024 йил ноябрь ойида бўлиб ўтган президентлик сайловларида ғалаба қозониб, иккинчи муддатга қайта сайланган эди.

Эслатиб ўтамиз, аввалроқ Дональд Трамп Пентагонга ёрдам бериш учун ўзга сайёраликлар ҳақидаги ҳукумат ҳужжатларини очишга буйруқ берганди.