Трамп Туркияни эски самолётда тарк этди (видео)

Кеча, 8 июль куни АҚШ Президенти Дональд Трамп НАТО саммити якунлангач, Туркияни Қатар томонидан совға қилинган янги самолётда эмас, балки эски Boeing VC-25A самолётида тарк этди. Бу ҳақда у ўзининг Truth Social ижтимоий тармоғидаги саҳифасида ёзиб қолдирди.

Аввалроқ, АҚШ Президенти Дональд Трамп Анқарада бўлиб ўтган НАТО давлат ва ҳукумат раҳбарлари саммити учун Туркияга Қатар амири томонидан совға қилинган, тахминий қиймати 500 миллион доллар атрофида деб баҳоланган улкан Boeing самолётида келгани кенг муҳокамаларга сабаб бўлган эди.

Маълум қилинишича, Трамп Анқарадан Буюк Британиядаги RAF Mildenhall авиабазасига эски, оч ҳаворанг Air Force One бортида учган. У ердан эса Вашингтонга қайтиш учун яна Қатар совға қилган янги президент самолётига ўтган.

“Эски кунларни ёдга олиш учун танладим”, деб ёзган Трамп Truth Social ижтимоий тармоғидаги саҳифасида.

Шунингдек, у Анқарадан Буюк Британиядаги RAF Mildenhall’га учиш учун эски, кўк рангли Air Force One самолётидан фойдаланишини, янги самолёт эса ўша базада тўхтаб, у ерда жойлашган АҚШ ҳарбий хизматчилари самолётни кўздан кечиришлари мумкинлигини қайд этган.

“Boeing 747 ҳақиқатан ҳам ажойиб самолёт”, деб қўшимча қилган у.

Қатар томонидан АҚШга совға қилинган Boeing 747 Трамп фойдаланиши учун вақтинчалик Air Force One сифатида қайта жиҳозланган. Қиймати 500 миллион долларга баҳоланадиган ушбу ҳаво кемаси оддий самолёт эмас, балки замонавий алоқа маркази, илғор мудофаа тизимлари ва махсус жиҳозларга эга “учувчи штаб” ҳисобланади. Унда президент учун алоҳида ётоқхона, меҳмонларни қабул қилиш хоналари, йиғилиш заллари ҳамда парвоз давомида давлат бошқарувини олиб боришга имкон берувчи махсус алоқа тизимлари мавжуд.

Анқарадаги матбуот анжуманида журналистлар Трампдан Туркиядан кетишда самолётни алмаштиргани Эрон томонидан бўлиши мумкин бўлган суиқасд таҳдиди билан боғлиқми, деб сўраган. Трамп бунга аниқ жавоб бермаган, аммо бундай таҳдид эҳтимолини ҳам рад этмаган.

“Эроннинг ўлдирилиши керак бўлганлар рўйхатида биринчи ўринда мен тураман. Билмайман, буни сизга айта олмайман, лекин менга барибир”, деган у.

Қатар совға қилган самолётдан фойдаланиш АҚШда баҳс-мунозараларга сабаб бўлмоқда. Айрим экспертлар уни қисқа муддатда қайта жиҳозлангани боис хавфсизлик даражаси юзасидан саволларни ўртага ташлаган.

Эслатиб ўтамиз, аввалроқ АҚШ Президенти Дональд Трамп Сурия Президенти Аҳмад аш-Шараага мамлакатни АҚШнинг терроризмни қўллаб-қувватловчи давлатлар рўйхатидан чиқаришга қарор қилганини айтгани ҳақида хабар берилган эди.