Трамп Туркияга бориши мумкин

Туркия Президенти Ражаб Тойиб Эрдўған ва АҚШ Президенти Дональд Трамп ўртасида кутилаётган учрашув Америка раҳбарининг қароргоҳи бўлмиш Оқ уйда ёки Туркияда бўлиши мумкин. Бу ҳақда “Hurriyet” хабар берди.

Нашр хабарига кўра, Президентлар Ражаб Тойиб Эрдўған ва Дональд Трамп ўртасида кутилаётган саммитнинг икки хил сценарийси кўриб чиқилмоқда. Биринчи вариантга кўра, Трамп май ойи ўрталарида Саудия Арабистонига ташриф буюриши, сўнгра Қатар ва Бирлашган Араб Амирликларига бориши ва сафар охирида Туркияда тўхташи кутилмоқда.

Иккинчи вариант – учрашув АҚШдаги Оқ уйда бўлиб ўтади. Олдин учрашув апрелнинг охири ёки майнинг бошида бўлиши гапирилган бўлса, ҳозир асосий эътибор июнга қаратилмоқда.

Қолаверса, Анталия дипломатик форумида сўзга чиққан Туркия Ташқи ишлар вазири Хоқон Фидан АҚШ Президенти Дональд Трампнинг Туркияга эҳтимолий ташрифи ҳақида ноаниқ баёнот берган.

“Ҳозирча аниқ вазият йўқ. Музокаралар давом этмоқда. Учрашув Туркияда ёки АҚШда бўлиши устида иш олиб борилмоқда”, деган Фидан.

Қайд этиш жоиз, Трамп Эрдўғанга алоҳида қизиқиш билдираётгани анчадан бери маълум. Ҳатто Исроил Бош вазири Биньямин Нетаняху билан сўнгги учрашуви чоғида Трамп Туркия раҳбарини мақтаб ўтган.

“Мен Эрдўған исмли одам билан жуда яхши муносабатдаман. Мен уни ҳурмат қиламан, у ҳам мени ҳурмат қилади”, деган эди Трамп.

Ушбу учрашувда Трамп Нетаньяхунинг Туркия ҳақидаги шикоятларига ҳам жавоб берган. 

“Туркия билан ҳар қандай муаммонгизни ҳал қила оламан, деб ўйлайман. Лекин сиз ҳам инсофли бўлишингиз керак”, деган Оқ уй раҳбари.