Netanyaxu yana Oq uyda. Asosiy mavzular

Isroil Bosh vaziri Binyamin Netanyaxu kecha, 7 aprel kuni Vashingtonda AQSH Prezidenti Donald Tramp bilan uchrashdi va u dunyo mamlakatlariga tariflarni joriy qilganidan keyin Tramp huzuriga borgan birinchi xorijiy davlat rahbari bo‘ldi.

Tramp muzokaralar uchun kelgan Isroil Bosh vazirini Oq uy eshigi oldida kutib oldi.

Netanyaxu Tramp bilan Oval ofisda uchrashar ekan, Bosh vazir Isroilning savdo kamomadini juda tez bartaraf etish uchun harakat qilishini aytdi va uning mamlakati ko‘plab davlatlarga namuna bo‘lishi mumkinligini qo‘shimcha qildi.

AQSH Prezidenti esa jurnalistlarning Isroilga bojlarni olib tashlash-tashlamasligi haqidagi savollariga e’tibor bermadi. U Isroilga joriy qilgan 17 foizlik bojlarni kamaytirishni rejalashtiryaptimi, degan savolga javob berishdan ham bosh tortdi.

Prezident Tramp Qo‘shma Shtatlar Isroilga ko‘rsatayotgan katta yordamni ta’kidlab, tariflarni bekor qilishga va’da bermadi. 

Tomonlar, shuningdek, G‘azoda davom etayotgan mojaro haqida gapirib, HAMAS tomonidan garovga olingan isroilliklarning holatiga e’tibor qaratdi.

Bundan tashqari, Prezident Tramp 12 aprel kuni Eron bilan Eronning yadroviy dasturi bo‘yicha to‘g‘ridan to‘g‘ri muzokaralar boshlanishi kutilayotganini e’lon qilib, Tehronni bu muzokaralar natija bermasa, katta xavfga duch kelishi mumkinligidan ogohlantirdi. 

Shuningdek, Oval kabinetdagi uchrashuv chog‘ida Donald Tramp o‘zini Isroil va Turkiya o‘rtasidagi Suriya bo‘yicha kurashda vositachi sifatida ta’kidladi. Tramp Turkiya yetakchisi Rajab Toyib Erdo‘g‘an bilan bo‘lgan ajoyib munosabatlarini muzokaralar uchun yo‘l deb atadi. Netanyaxu Turkiyaning Suriyadagi ta’siridan Isroilning xavotirlarini bildirdi. U Suriyani hech kim, jumladan Turkiya ham Isroilga hujum qilish uchun baza sifatida foydalanishini ko‘rishni istamasligini aytdi.

“Biz Suriyadagi vaziyatni ham muhokama qildik. Bizda Turkiya bilan qo‘shnichilik munosabatlarimiz yomonlashgan va Suriyadan hech kim, shu jumladan Turkiya ham Isroilga hujum qilish uchun baza sifatida foydalanishini ko‘rishni istamaymiz. Turkiya AQSH bilan juda yaxshi aloqaga ega davlat. Prezident Turkiya rahbari bilan munosabatlarga ega. Biz bu mojarodan qanday qutulish mumkinligini muhokama qildik va AQSH Prezidenti bilan har xil yo‘llar bilan bu to‘qnashuvni oldini olish mumkin, deb o‘ylayman”, dedi Netanyaxu.

Turkiya deyarli 14 yillik fuqarolar urushidan so‘ng dekabr oyida Bashar Asadni hokimiyatdan ag‘dargan yangi ma’muriyatning asosiy qo‘llab-quvvatlovchisi hisoblanadi. Anqaraning Suriyadagi yangi hokimiyatga ta’siri hukumat kuchlarini chegaradan qaytarish uchun Suriya janubiga zarbalar va quruqlikdan hujumlar uyushtirgan Isroilni xavotirga solmoqda.

Tramp va Netanyaxuning uchrashuvi boshlanishidan biroz oldin AQSH Prezidenti va Isroil Bosh vazirining rejalashtirilgan matbuot anjumani bekor qilindi. Oq uy o‘zgarish sabablarini ochiqlamadi.