Нетаньяху яна Оқ уйда. Асосий мавзулар

Исроил Бош вазири Биньямин Нетаньяху кеча, 7 апрель куни Вашингтонда АҚШ Президенти Дональд Трамп билан учрашди ва у дунё мамлакатларига тарифларни жорий қилганидан кейин Трамп ҳузурига борган биринчи хорижий давлат раҳбари бўлди.

Трамп музокаралар учун келган Исроил Бош вазирини Оқ уй эшиги олдида кутиб олди.

Нетаньяху Трамп билан Овал офисда учрашар экан, Бош вазир Исроилнинг савдо камомадини жуда тез бартараф этиш учун ҳаракат қилишини айтди ва унинг мамлакати кўплаб давлатларга намуна бўлиши мумкинлигини қўшимча қилди.

АҚШ Президенти эса журналистларнинг Исроилга божларни олиб ташлаш-ташламаслиги ҳақидаги саволларига эътибор бермади. У Исроилга жорий қилган 17 фоизлик божларни камайтиришни режалаштиряптими, деган саволга жавоб беришдан ҳам бош тортди.

Президент Трамп Қўшма Штатлар Исроилга кўрсатаётган катта ёрдамни таъкидлаб, тарифларни бекор қилишга ваъда бермади. 

Томонлар, шунингдек, Ғазода давом этаётган можаро ҳақида гапириб, ҲАМАС томонидан гаровга олинган исроилликларнинг ҳолатига эътибор қаратди.

Бундан ташқари, Президент Трамп 12 апрель куни Эрон билан Эроннинг ядровий дастури бўйича тўғридан тўғри музокаралар бошланиши кутилаётганини эълон қилиб, Теҳронни бу музокаралар натижа бермаса, катта хавфга дуч келиши мумкинлигидан огоҳлантирди. 

Шунингдек, Овал кабинетдаги учрашув чоғида Дональд Трамп ўзини Исроил ва Туркия ўртасидаги Сурия бўйича курашда воситачи сифатида таъкидлади. Трамп Туркия етакчиси Ражаб Тойиб Эрдўған билан бўлган ажойиб муносабатларини музокаралар учун йўл деб атади. Нетаньяху Туркиянинг Суриядаги таъсиридан Исроилнинг хавотирларини билдирди. У Сурияни ҳеч ким, жумладан Туркия ҳам Исроилга ҳужум қилиш учун база сифатида фойдаланишини кўришни истамаслигини айтди.

“Биз Суриядаги вазиятни ҳам муҳокама қилдик. Бизда Туркия билан қўшничилик муносабатларимиз ёмонлашган ва Суриядан ҳеч ким, шу жумладан Туркия ҳам Исроилга ҳужум қилиш учун база сифатида фойдаланишини кўришни истамаймиз. Туркия АҚШ билан жуда яхши алоқага эга давлат. Президент Туркия раҳбари билан муносабатларга эга. Биз бу можародан қандай қутулиш мумкинлигини муҳокама қилдик ва АҚШ Президенти билан ҳар хил йўллар билан бу тўқнашувни олдини олиш мумкин, деб ўйлайман”, деди Нетаньяху.

Туркия деярли 14 йиллик фуқаролар урушидан сўнг декабрь ойида Башар Асадни ҳокимиятдан ағдарган янги маъмуриятнинг асосий қўллаб-қувватловчиси ҳисобланади. Анқаранинг Суриядаги янги ҳокимиятга таъсири ҳукумат кучларини чегарадан қайтариш учун Сурия жанубига зарбалар ва қуруқликдан ҳужумлар уюштирган Исроилни хавотирга солмоқда.

Трамп ва Нетаньяхунинг учрашуви бошланишидан бироз олдин АҚШ Президенти ва Исроил Бош вазирининг режалаштирилган матбуот анжумани бекор қилинди. Оқ уй ўзгариш сабабларини очиқламади.