Трамп Си Цзиньпин билан гаплашиб олмоқчи

АҚШ Президенти Дональд Трамп шу ҳафта охирида Хитой раҳбари Си Цзиньпин билан телефон орқали мулоқот қилишни кутилмоқда. Бу ҳақда Америка етакчиси Оқ уйда журналистларга маълум қилди. 

“Мен Президент Си билан ҳафта охирида гаплашаман”, деди Трамп АҚШ ва Хитой ўртасида эришилган савдо келишувларини шарҳлар экан. 

Унинг қайд этишича, Пекин ва Вашингтон ўртасидаги муносабатлар жуда яхши. 

“Биз Хитойга зарар етказмоқчи эмасмиз”, дейди АҚШ маъмурияти раҳбари.  

Унинг фикрича, Вашингтон томонидан Хитойдан импорт қилинадиган маҳсулотларга қўйилган божхона тўловлари Пекин иқтисодиётига қаттиқ зарба берган. 

Маълумот учун, Трамп 2 апрель куни 185 мамлакат ва ҳудуд маҳсулотларига божлар жорий этилишини эълон қилди. 10 фоизлик универсал тарифлар 5 апрелдан, индивидуал тарифлар 9 апрелдан кучга кирди. Бундан ташқари, АҚШ маъмурияти 3 апрелдан бошлаб барча импорт қилинган автомобилларга 25 фоизлик божхона тўловларини жорий қилди. Трамп, шунингдек, иқтисодий вазият туфайли мамлакатда фавқулодда ҳолат эълон қилди. Шундан сўнг Трамп бир қатор мамлакатлар ва ҳудудларга қўшимча ўзаро импорт тарифларини 90 кунга тўхтатиб қўйганини билдирди. Оқ уйнинг тушунтиришича, пауза савдо музокаралари билан боғлиқ бўлиб, бу вақт мобайнида “10 фоизлик универсал тариф” амал қилади. АҚШ Хитой импортига қўшимча тарифларни уч марта ошириб, охир-оқибат 145% га этказди. Апрель ойида Хитой қарши чора сифатида барча Америка маҳсулотларига тарифларни белгилади ва уларни 125% га етказди. 

Эслатиб ўтамиз, 10-11 май кунлари Швейцарияда АҚШ ва Хитой ўртасида савдо-иқтисодий масалалар бўйича музокаралар бўлиб ўтди. Ушбу музокаралардан сўнг томонлар 2025 йил 14 майдан бошлаб божлар 10 фоизга ўзаро пасайтирилганини эълон қилди.