Трамп Россиянинг Киевга ҳужуми барбод бўлишида “аҳмоқ генерал”ни айблади

Россиянинг Киевга ҳужуми россиялик генералнинг магистраль бўйлаб ҳаракатланаётган танкларни лойга ботириб қўйгани сабаб барбод бўлгани иддао қилинди. Бу ҳақда АҚШ Президенти Дональд Трамп жорий йилнинг 20 октябрь куни Оқ уйда журналистлар билан мулоқот чоғида гапирди.

Трамп Россия-Украина урушини 24 соат ичида якунлашга бир неча бор ваъда берган эди, аммо тинчлик музокаралари ҳанузгача сезиларли даражада илгариламади. У тафсилотларни озгина ўзгартирган ҳолда кенг кўламли босқиннинг илк кунлари ҳақида ҳам мунтазам равишда фикр билдириб келади. Бу сафар у Киевга қараб ҳаракатланган, аммо лойга ботиб қолган Россия танкларини тилга олган. 

“Аҳмоқ рус генерали, жуда аҳмоқ одам. Уларда мингта танк бетон магистраль бўйлаб ҳаракатланаётган эди. Ҳеч нарса уларни тўхтата олмасди. Уруш бир кунда тугаган бўларди. Аммо бу жуда аҳмоқ генерал – унинг кимлигини мутлақо билмайман, ҳали ҳам тириклигига ва орамизда эканига шубҳам бор – ўнгга, экин майдонлари томон бурилишга, сўнг чапга ва Киев томон ҳаракатланишга қарор қилди. У шосседа – бетон магистралда, улар жуда яхши олдинга силжиётган тузуккина йўлда қолиш ўрнига шундай қилди. Оқибатда танклар лойга ботиб қолди”, дейди Трамп.

BBC Трампнинг ушбу баёнотини текшириб кўрган. Маълум бўлишича, 2022 йил февраль ойида Беларусь томондан Россия қўшинларининг Киевга ҳужумига генерал-полковник Александр Чайко бошчилик қилган. Нашрнинг қайд этишича, ҳужумнинг барбод бўлиши унинг айнан йўлдан бурилиш ҳақидаги муайян қарори билан боғлиқ бўлмаган.

Эслатиб ўтамиз, аввалроқ Россия Президенти Владимир Путин АҚШ воситачилигида Украина билан уч томонлама тинчлик музокараларини келаси ой қайта бошлашга рози бўлгани ҳақида хабар берилган эди. Музокаралар жорий йилнинг 10 ноябрида ёки ундан кейин Бирлашган Араб Амирликларининг Абу-Даби шаҳрида ўтказилиши мумкин.