Трамп рекорд даражадаги мудофаа бюджетини имзолади

АҚШ Президенти Дональд Трамп мамлакатнинг 2026-молия йили учун мудофаа бюджетини имзолади, унда рекорд даражадаги 901 миллиард доллар миқдорида ҳарбий харажатлар кўзда тутилган.  Бу ҳақда кеча, 18 декабрь куни Оқ уй эълон қилди.

Трамп куч орқали тинчликни ушлаб туришини, Миллий мудофаа ваколатлари тўғрисидаги қонун (NDAA) Американи ички ва ташқи таҳдидлардан ҳимоя қилиши кераклигини маълум қилди.

 “Бу ҳарбий департаментга менинг “Куч орқали тинчлик” сиёсатимни амалга ошириш, ватанни ички ва ташқи таҳдидлардан ҳимоя қилиш ва мудофаа саноати базасини мустаҳкамлаш имконини беради, шу билан бирга мамлакатимиз ҳарбийларининг руҳини пасайтирадиган исрофгарчилик ва радикал дастурларни молиялаштиришга чек қўяди”, деди Трамп Оқ уй веб-сайтида чоп этилган баёнотда.

АҚШ Вакиллар палатаси NDAA'ни 11 декабрь куни маъқуллади ва Сенат қонун лойиҳасини 17 декабрь куни қабул қилди. Ҳужжат ҳарбий хизматчиларнинг иш ҳақини 3,8 фоизга оширишни, ҳарбий техника сотиб олишни ва АҚШнинг асосий рақобатчилари – Хитой ва Россияга қарши рақобатбардошлигини ошириш чораларини кўзда тутади.

2026 йилги мудофаа бюджети Европада хавфсизликни мустаҳкамлашга қаратилган бир нечта қоидаларни ўз ичига олади, бу эса шу ой бошида Трамп томонидан тақдим этилган АҚШ Миллий хавфсизлик стратегиясига зид келади. Умуман олганда, АҚШнинг 901 миллиард долларлик мудофаа бюджети президентнинг ушбу эҳтиёжлар учун сўровидан 8 миллиард долларга кўп.

Трамп Конгрессдан 2026 йилда ҳарбий харажатлар учун 892,6 миллиард доллар ажратишни сўради. Сенат дастлаб уни 925 миллиард долларгача оширишни таклиф қилди, Вакиллар палатаси эса Трампнинг таклифи билан бир хил миқдорни қўллаб-қувватлади. 30 сентябрда тугаган 2025 молия йилида АҚШ мудофаа бюджети 884 миллиард долларни ташкил этди.

Шунингдек, ҳужжатда Украинани қўллаб-қувватлашга алоҳида урғу берилган. Қонунда Украина Хавфсизлигига Ёрдам Ташаббуси (USAI) орқали кейинги икки йил ичида ҳар бири 400 миллион доллардан 800 миллион доллар ажратиш кўзда тутилган. Ушбу маблағлар Америка компаниялари орқали Украина Қуролли Кучлари учун қурол сотиб олиш учун ишлатилади.

Болтиқбўйи давлатлари –  Эстония, Латвия ва Литва мудофааси учун яна 175 миллион доллар ажратилган. Бундан ташқари, қонун АҚШ Мудофаа вазирлигининг Европадаги Америка қўшинлари сонини 76 000 дан камайтириш имкониятини чеклайди. Европадаги АҚШ қўмондонига НАТОнинг Олий Иттифоқдош Қўмондони лавозимидан воз кечиш тақиқланган.

Маълумот ўрнида, Қонун лойиҳасида Трампнинг АҚШ Мудофаа вазирлиги номини "Уруш вазирлиги" деб ўзгартириш таклифи тилга олинмаган. АҚШ маъмурияти аллақачон бу номдан фойдаланаётган бўлса-да, Мудофаа вазири Пит Ҳегсет ўзини "Уруш бўйича давлат котиби" деб атаса-да, ўзгартириш расман Конгресс томонидан тасдиқланиши керак.