Трамп Путин ваъдасида турганини айтди, бироқ... (видео)

Россия Президенти Владимир Путин Украинага берилаётган зарбаларни маълум муддатга тўхтатиш орқали ўз ваъдасида турди. Бу ҳақда кеча, 3 февраль куни АҚШ Президенти Дональд Трамп журналистларга берган баёнотида маълум қилди.

“Ўт очишни тўхтатиш 25 январь кунидан 1 февраль кунигача давом этди. У тугади ва Путин энди уларга кучли зарба берди. Путин бу масалада ўз сўзида турди. Бу муҳим эди, биласиз, бир ҳафта – биз ҳар қандай муддатга рози бўлган бўлардик, чунки у ерда жуда-жуда совуқ”, деган Оқ уй раҳбари.

Шунингдек, Трамп Россия Президенти билан суҳбатлашганини айтган, бироқ суҳбатнинг қачон бўлиб ўтгани ва тафсилотларини ошкор этмаган.

29 январь куни Трамп Владимир Путинга шахсан мурожаат қилиб, кучли совуқлар сабаб Украинага берилаётган зарбаларни вақтинча тўхтатишни сўраган эди. Унинг айтишича, Россия Президенти бу таклифга рози бўлган. Кейинчалик Путиннинг матбуот котиби Дмитрий Песков Трамп Киевга 1 февралгача ҳужум қилмасликни таклиф этганини, бу эса ҳарбий можарони тартибга солиш бўйича музокаралар учун шароит яратишга қаратилганини тушунтирган.

Кеча, 3 февраль куни Россия Мудофаа вазирлиги тунда кенг кўламли зарба берилгани ҳақида хабар берди. Унга кўра, ҳужум нишонлари Украинанинг ҳарбий-саноат мажмуаси объектлари ҳамда энергетика инфратузилмаси бўлган. Вазирлик маълумотида айтилишича, мазкур зарба Киев томонидан Россиядаги фуқаролик объектларига уюштирилган ҳужумларга жавоб тариқасида амалга оширилган.

Қайд этиш жоиз, Россия Президенти Владимир Путин совуқ об-ҳаво туфайли Украинага ҳужум қилмасликка қарор қилгани ҳақида хабар берилган эди. Бироқ, ушбу оғзаки келишувга қарамай, 30 январь куни Россия Украина ҳудудига ҳужум уюштирганди.