Трамп Нигерияга қўшин юбориш билан таҳдид қилди

АҚШ Президенти Дональд Трамп “агар Нигерия ҳукумати насронийларни ўлдиришга йўл қўйишда давом этса”, Нигерияга АҚШ кучларини юбориш билан таҳдид қилди. Оқ уй раҳбари бу таҳдидни кеча, 1 ноябрь куни Truth Social ижтимоий тармоғидга жойлаштирди.

У бундай ҳолатда “Қўшма Штатлар Нигерияга барча ёрдам ва кўмакни дарҳол тўхтатади” ва “эҳтимол”, “бу даҳшатли ваҳшийликларни содир этаётган ислом террорчиларини бутунлай йўқ қилиш” учун ўз кучларини мамлакатга жойлаштиради, деб таъкидлади. Трамп мамлакат ҳарбийларига “мумкин бўлган ҳаракатларга тайёргарлик кўриш” бўйича аллақачон кўрсатма берганини қўшимча қилди.

“НИГEРИЯ ҲУКУМАТИ ШОШИЛИНГ!” деб ёзган Америка етакчиси.

"Нигерияда ва бошқа ҳар қандай мамлакатда бегуноҳ насронийларни ўлдириш дарҳол тўхтатилиши керак. Уруш вазирлиги ҳаракатга тайёрланмоқда. Ёки Нигерия ҳукумати насронийларни ҳимоя қилади ёки биз бу даҳшатли ваҳшийликларни содир этаётган террорчиларни ўлдирамиз”, деб ёзди Пентагон раҳбари Пит Ҳегсет Х ижтимоий тармоқ платформасида.

Нигерия Президенти ўз мамлакатига қарши айбловларни рад этади

“Нигерияни бошқа динларга нисбатан муросасиз мамлакат сифатида тавсифлаш бизнинг миллий воқелигимизни акс эттирмайди. Диний эркинлик ва бағрикенглик бизнинг жамоавий кимлигимизнинг асосий тамойиллари бўлиб келган ва шундай бўлиб қолади”, деб ёзган Нигерия Президенти Бола Тинубу 1 ноябрь куни Х ижтимоий медиа платформасида.

2025 йил март ойида АҚШ конгрессмени Крис Смит Давлат департаментидан Нигерияни “алоҳида ташвишга сабаб бўлган мамлакат” деб белгилашга чақирди. Октябрь ойи бошида республикачи сенатор Тед Круз ва конгрессмен Райли Мур Нигерия ҳукуматини насронийларнинг “оммавий қирғинлари”га кўз юмганликда айблаган.