Трамп мис импортига 50 фоизлик бож эълон қилди

АҚШ Президенти Дональд Трамп савдо келишмовчилигини янада кучайтирмоқда. Кеча, 8 июль куни Оқ уйда ўтказилган йиғилишда у мис импортига 50 фоизлик бож жорий этиш ва дори-дармонларга тарифларни 200 фоизгача ошириш режасини маълум қилди.

Бу баёнотдан сўнг халқаро бозорларда мис нархи кескин ошиб, ҳар тоннаси 12 330 долларга етди. Шу билан бирга, Трамп дори воситалари импортига 200 фоизлик бож қўллаш билан таҳдид қилди, бироқ ишлаб чиқарувчиларга ўз ишларини “йўлга қўйиш” учун бир йиллик муҳлат берилишини айтди.

Ҳозирча мис импортига янги тарифларнинг қайси санадан бошлаб кучга кириши аниқ эмас. Бу қарорлар аввал жорий этилган темир, алюминий ва автотранспорт воситалари импортига божларга қўшимча бўлади. Шу билан бирга, Трамп 7 июль куни Европа Иттифоқи ва бошқа айрим давлатлардан келадиган товарларга тарифларни оширишни 1 августгача кечиктирди. Бу чоралар 8 июлдан кучга кириши керак эди.

Оқ уй мақсади – АҚШда мис ишлаб чиқаришни рағбатлантириш

Мис электромобиллар, қурол-яроғ ва электр тармоқлари учун муҳим хомашё ҳисобланади. АҚШ маъмуриятининг айтишича, унинг импортига божни ошириш орқали мамлакатда ички ишлаб чиқаришни кенгайтириш кўзда тутилмоқда.

Йель университети қошидаги The Budget Lab таҳлилий маркази тадқиқотига кўра, ҳозирги пайтда амал қилаётган 17,6 фоизлик божнинг ўзиёқ АҚШ истеъмолчилари учун жиддий салбий таъсирларни келтириб чиқарган. Бу кўрсаткич 1934 йилдан бери энг юқори даражани ташкил қилади.

Шу билан бирга, Вашингтон божлар орқали олинаётган катта даромадларга эътибор қаратмоқда. АҚШ Молия вазири Скот Бессентнинг айтишича, мамлакат божлар орқали ҳозиргача 100 миллиард доллар йиғган ва йил охиригача бу сумма 300 миллиардга етиши мумкин.

Бироқ Европа Иттифоқи агар музокаралар самара бермаса, жавоб чоралари кўриш билан таҳдид қилмоқда.

Трампнинг ЕИ билан савдо уруши 

Дональд Трамп 4 апрель куни деярли бутун дунё давлатларига нисбатан кенг кўламли бож тўловлари жорий этилишини эълон қилган эди. Кейинчалик у 90 кунлик кечиктиришни жорий қилган, бу муддат 8 июль куни тугаши керак эди. Ҳозирги кунда ЕИдан келтирилаётган кўплаб маҳсулотлар учун асосий тариф 10 фоизни ташкил қилади. Европа автомобиллари 25 фоизлик оширилган бож билан, пўлат ва алюминий эса 50 фоизлик бож билан солиққа тортилади. Трамп, агар Европа Иттифоқи келишувга бормаса, ЕИдан келтириладиган барча товарларга 50 фоизлик тариф жорий этилишини айтган.

6 июль куни Европа Комиссияси раиси Урсула фон дер Ляйен Дональд Трамп билан телефон орқали суҳбатлашди. Бу суҳбат якунларига кўра, у шундай баёнот берди: Европа Иттифоқи яқин кунларда АҚШ билан бож масаласида келишувга эришишга умид қилмоқда.