Трамп Миллий разведка раҳбари вазифасини ипотека агентлиги раҳбарига топширди

АҚШ Президенти Дональд Трамп Миллий разведка директори вазифасини вақтинча кўчмас мулк соҳасидаги тадбиркор Билл Пултега топширди. Бу ҳақда Трамп ўзининг Truth Social тармоғида маълум қилди.

Трамп кеча, 2 июнь куни ўз платформасида Билл Пулте Американинг энг нозик масалаларини ҳал этиш, молия бозорларининг хавфсизлиги ва барқарорлигини таъминлаш ҳамда Fannie Mae ва Freddie Mac тизимларидаги 10 триллион доллардан ортиқ активларни бошқариш бўйича катта тажрибага эга эканини таъкидлаган.

38 ёшли Пулте аввал махсус хизматлар ёки разведка тизимида ишламаган. Шунга қарамай, у доимий раҳбар тайинлангунига қадар АҚШнинг 18 та разведка идораси фаолиятини мувофиқлаштириб туради.

Трампнинг маълум қилишича, Билл Пулте аввалги лавозимларини ҳам сақлаб қолади. У Трамп Оқ уйга қайтганидан кейин 2008 йилги ипотека инқирозидан сўнг ташкил этилган Федерал уй-жой молиялаштириш агентлиги директори этиб тайинланган эди. Шунингдек, у давлат ипотека агентликлари — Fannie Mae ва Freddie Mac’га ҳам раҳбарлик қилмоқда.

АҚШнинг айрим оммавий ахборот воситалари Пултени Трампнинг “жанговар ҳимоячиси” деб атамоқда. Бунга унинг Трампнинг сиёсий рақибларига қарши мунтазам чиқишлари сабаб бўлган.

Жумладан, у Нью-Йорк штати бош прокурори Летиция Жеймсни ипотека кредити олишда фирибгарлик қилганликда айблаган. Бу Жеймс Трампга нисбатан тергов бошлаганидан кейин юз берган.

Пулте, шунингдек, АҚШ Федерал захира тизими бошқарув кенгаши аъзоси Лиза Кукни ҳам фирибгарликда айблаган. Трамп аввалроқ унинг лавозимидан кетишини талаб қилган эди.

Тулси Габбард 22 май куни Дональд Трампга истеъфо аризасини юборган. У қарорини турмуш ўртоғининг касаллиги билан изоҳлаган.

“The Wall Street Journal” нашри маълумотига кўра, Габбард АҚШ ва Исроилнинг Эронга қарши ҳарбий амалиётлари муҳокамаларида иштирок этмаган. Шунингдек, у айрим ҳолларда Яқин Шарқдаги вазият бўйича Трамп маъмуриятининг расмий позициясига зид баёнотлар берган.