Трамп Мексика кўрфазининг номини ўзгартирмоқчи

АҚШнинг сайланган президенти Дональд Трамп Мексика кўрфазини “Америка кўрфази” деб ўзгартириш ниятида эканини айтди. Бу ҳақда у Мар-а-Лагодаги мулкида бўлиб ўтган матбуот анжуманида маълум қилди.

“Бу ҳақда тез орада эълон қиламиз. Биз ишнинг катта қисмини шу ҳудудда қиламиз ва бу бизники. Биз Мексика кўрфазининг номини “Америка кўрфази” деб ўзгартирмоқчимиз. Бу кенг майдонни қамраб олган ажойиб ном”, деди у.

Трамп, шунингдек, Панама маъмурлари билан АҚШга қайтиш ниятида бўлган Панама канали масаласи бўйича аллақачон музокаралар олиб бораётганини айтди.

Унинг сўзларига кўра, у Гренландия ва Панама канали устидан назоратни қўлга киритиш учун иқтисодий ва ҳарбий босимдан фойдаланмаслигига бошқа мамлакатларга ваъда бера олмайди.

Трампнинг айтишича, бу ҳудудлар устидан назорат АҚШнинг иқтисодий хавфсизлиги учун зарур.

Панама Ташқи ишлар вазирлиги раҳбари мамлакат ҳукумати Трамп ва унинг вакиллари билан Панама каналининг келажаги бўйича ҳеч қандай алоқага эга эмаслигини айтди. Унинг сўзларига кўра, канал суверенитети муҳокама мавзуси бўла олмайди.

“Сайланган президент лавозимга киришгач, муносабатлар одатий ва тегишли расмий усуллар орқали тартибга солинади”, деди вазир.

1914 йилда очилган Панама канали 63 йил давомида АҚШ назоратида эди. Мамлакатлар ўртасида тузилган Торрихос-Картер келишуви унинг босқичма-босқич ўтказилишини назарда тутган. Жараён 1999 йилда якунланган.

Эслатиб ўтамиз, ўтган йилнинг 21 декабрь куни Трамп Панамани Панама каналидан фойдаланганлик учун “бемаъни” юқори тарифлар жорий этишда айблаганди ва уни АҚШ назоратига қайтаришни талаб қилиш билан таҳдид қилганди. У каналнинг нотўғри қўлларга, хусусан, Хитой назорати остида бўлишига йўл қўймаслигини қўшимча қилганди. Бунга жавобан Панама Президенти Хосе Рауль Мулино Панама канали ва унинг атрофидаги ҳудудларнинг ҳар бир квадрат метри Панамага тегишли экани ва бундан кейин ҳам Панамага тегишли бўлиб қолишини билдирди.