Трамп Маск билан жанжалга сабаб бўлган қонунни имзолади (видео)

Кеча, 4 июль куни АҚШ Президенти Дональд Трамп миллиардер Илон Маск билан жанжалга сабаб бўлган АҚШ бюджети тўғрисидаги “катта ва гўзал қонун”ни (The Big Beautiful Bill) имзолади. Бу ҳақда CBS News хабар берди.

Қайд этилишича, ҳужжатни имзолаш маросими тантанали руҳда ўтказилган, шунингдек, тадбир Оқ уйда Мустақиллик куни шарафига ўтказилган байрам тадбирига тўғри келган. “Fox News”нинг ёзишича, маросим вақтида Президент қароргоҳи устидан F22 ва F35 қирувчилари ҳамда B-2 бомбардимончи самолёти учиб ўтган.

Олдинроқ Президентнинг “гўзал қонуни” якуний таҳрирда Вакиллар палатаси ва Сенат томонидан маъқулланган эди. Палатанинг 218 аъзоси ҳужжатни ёқлаб, 214 нафари эса унга қарши овоз берди, уларнинг икки нафари республикачилар эди.

Ҳужжат Трампнинг 2017 йилда – унинг биринчи президентлиги даврида жорий этган солиқ енгилликларини узайтиришни, чойпули ва ортиқча иш учун солиқ чегирмаларини киритишни, давлат қарзининг юқори чегарасини 5 триллион долларга оширишни, болалар учун солиқ чегирмасини 2200 долларга оширишни ҳамда ёши катталар учун солиқ имтиёзларини кенгайтиришни назарда тутади.

Эслатиб ўтамиз, аввалроқ Дональд Трамп ва америкалик миллиардер, сайловолди дастурида Трампнинг асосий тарфдорларидан бўлган Илон Маск ушбу қонун лойиҳаси юзасидан жанжаллашиб қолган эди. Дастлаб, Президент қонун лойиҳасини танқид қилган Маскни мамлакатда энг кўп субсидия олувчи одам сифатида таърифлаган бўлса, миллиардер Трампнинг партиясини “семиз чўчқалар партияси”, деб айтган. Шунингдек, у янги партия тузиш билан таҳдид қилган.