Трамп Марказий Осиё раҳбарларини саммит ўтказишга таклиф қилди

АҚШ Президенти Дональд Трамп Марказий Осиё давлатлари раҳбарларини С5+1 шаклидаги саммитга таклиф қилди. Бу ҳақда Қозоғистон Президентининг матбуот хизмати хабар берди. 

Учрашув жорий йилнинг 6 ноябрь куни Вашингтон шаҳрида ўтказилиши режалаштирилган. 

Президент матбуот хизматининг маълум қилишича, Қозоғистон Президенти Қосим-Жомарт Тўқаев Трампнинг таклифини миннатдорлик билан қабул қилган ва АҚШ Президентининг олиб бораётган сиёсатини қўллаб-қувватлашини билдирган.

Маълумот учун, С5+1 формати аслида 2015 йилда ташкил этилган. Ўшандан бери 2023 йил 19 сентябрда биринчи марта давлат раҳбарлари иштирокида саммит ўтказилди. Тадбирда АҚШ Президенти Жо Байден, Қозоғистон Президенти Қосим-Жомарт Тўқаев, Қирғизистон раҳбари Садир Жапаров, Тожикистон етакчиси Имомали Раҳмон, Туркманистон Президенти Сердар Бердимуҳамедов ва Ўзбекистон раҳбари Шавкат Мирзиёев қатнашган.

Эслатиб ўтамиз, аввалроқ АҚШ Конгресси аъзолари Сидни Камлагер-Дав ва Билл Хёйзенга Президент Дональд Трампга дипломатик форумнинг 10 йиллиги муносабати билан Вашингтонда С5+1 саммитини ўтказишга даъват қилиб, мактуб йўллаганди. Мактубда конгрессменлар форумнинг юбилейи Марказий Осиё билан ҳамкорликни мустаҳкамлаш ва АҚШнинг минтақадаги хавфсизлик, иқтисодиёт, юмшоқ куч ва бошқарув соҳаларида стратегик манфаатларини илгари суриш учун ноёб имконият эканини таъкидлаган.