Трамп маъмурияти Қримни Россияники деб тан олиши мумкин – “Bloomberg”

АҚШ Президенти Дональд Трамп маъмурияти Москва ва Киев ўртасидаги кенгроқ тинчлик келишуви доирасида аннексия қилинган Украина яримороли Қрим устидан Россия “назорати”ни тан олишга тайёр. Бу ҳақда кеча, 18 апрель куни манбаларга таяниб, “Bloomberg” хабар берди.

Агентлик манбаларининг аниқлик киритишича, бу борада ҳали қарор қабул қилинмаган. Оқ уй ва Давлат департаменти эса изоҳ бериш сўровларига жавоб бермаган.

Украинадаги тинчлик музокараларининг бориши билан таниш бўлган АҚШ расмийси “Bloomberg”нинг Қримни Россияники деб тан олиш имконияти ҳақидаги саволига жавоб беришдан бош тортди.

14 апрель куни АҚШ Президентининг махсус вакили Стивен Уиткофф “Fox News” телеканалига Россия Президенти Владимир Путин Украинада тинчлик ўрнатишга интилаётганини, аммо “бу можародаги энг катта муаммо” Кремль талаб қилаётган бешта Украина ҳудуди Россияники деб тан олинишини айтди. Гап Қрим, Донецк, Луганск, Запорожье ва Херсон вилоятлари ҳақида бормоқда.

Эртаси куни Украина Президенти Владимир Зеленский Одессада НАТО Бош котиби Марк Рютте билан матбуот анжумани чоғида Уитткоффнинг сўзларига изоҳ берди:

“Барча ҳудудлар унитар Украина давлатига тегишли. Шунинг учун... давлатимиз ҳудуди ҳақида фақат Украина халқи гапириши мумкин”.

18 апрель куни АҚШ Президенти Дональд Трамп агар Россия ва Украина “тез орада” тинчлик ўрнатмаса, воситачилик ҳаракатларини тўхтатиш билан таҳдид қилган эди. Трамп бирон бир муддатни айтишдан бош тортди ва Америка воситачилигида бу масала “ниҳоясига етмаслигига” умид билдирди.