Трамп криптовалюта бизнесларидан $1,4 млрд даромад олди

АҚШ Президенти Дональд Трамп 2025 йилда криптовалютага оид бизнесларидан 1 миллиард АҚШ долларидан ортиқ даромад олди. Бу ҳақда ҳукуматнинг этика масалалари бўйича идорасига тақдим этилган йиллик молиявий декларацияда келтирилган.

Ҳужжатга кўра, Трампнинг иккинчи президентлик муддати давомида у ва унинг оиласи рақамли активлар соҳасига фаол сармоя киритган. Президент йил бошида АҚШни “дунёнинг криптовалюта пойтахти”га айлантириш ниятини билдирган эди. Ҳисоботда қайд этилишича, Трампнинг асосий криптовалюта лойиҳаси – World Liberty Financial бошқарув токенлари ва бошқа криптомаҳсулотларни сотиш орқали 500 миллион доллардан ортиқ даромад келтирган.

Шунингдек, CIC Digital LLC компанияси Трамп тасвири туширилган мем-коинлар савдосидан 600 миллион АҚШ долларидан зиёд маблағ ишлаган. Ушбу токенлар Президентнинг инаугурациясидан бир неча кун аввал муомалага чиқарилган.

Оқ уй матбуот котиби Анна Келли Президент ва унинг оиласи манфаатлар тўқнашувига йўл қўймаганини қайд этган.

“На Президент, на унинг оиласи ҳеч қачон манфаатлар тўқнашувида иштирок этмаган ва бундай қилмайди ҳам. Президент Трамп ижро қарорлари, GENIUS Act каби қонунларни қўллаб-қувватлаши ва бошқа оқилона сиёсатлар орқали АҚШни дунёнинг криптовалюта пойтахтига айлантирди”, дейди Келли.

Унинг билдиришича, Президент ва унинг маъмуриятининг барча қарорлари Америка халқи манфаатларини кўзлаб қабул қилинган. Шу билан бирга, ҳисоботда Трампнинг криптовалюта токенлари ва мем-коинлари савдоси бошланганидан бери уларнинг бозор қиймати сезиларли даражада пасайгани ҳам қайд этилган.

Молиявий декларацияга кўра, Трамп криптовалюталардан ташқари ҳам турли манбалардан катта даромад олган. Жумладан, Трамп бренди остидаги Инжил китоблари, кроссовкалар, соатлар ва бошқа сувенир маҳсулотлари савдосидан миллионлаб АҚШ доллари ишлаган. Фақат брендли соатлар савдосининг ўзи унга 4,7 миллион АҚШ доллари даромад келтирган.

Бундан ташқари, хориждаги кўчмас мулк лойиҳалари ҳам катта даромад манбаи бўлган. Бирлашган Араб Амирликларидаги лойиҳадан 10,4 миллион АҚШ доллари, Саудия Арабистонидаги меҳмонхона лойиҳасидан 9 миллион АҚШ доллари, Руминия пойтахти Бухарест ҳамда Қатардаги лойиҳалардан эса ҳар бири 5 миллион АҚШ долларидан даромад келган.

Ҳисоботда яна Трампнинг ABC, CBS, YouTube, Meta ва X компаниялари билан тузилган бешта ҳуқуқий келишув натижасида жами 86 миллион АҚШ долларидан ортиқ маблағ олгани ҳам қайд этилган.

Эслатиб ўтамиз, аввалроқ дунёда миллионерлар шиддат билан ортаётгани ҳақида хабар қилинганди.