Трамп Қатар совға қилган 400 млн долларлик “учар қаср”ни кўз-кўз қилди (видео)

АҚШ Президенти Дональд Трамп Қатар томонидан совға қилинган янги президент самолётини жамоатчиликка тақдим этди. Унинг айтишича, мазкур лайнер келгусида мамлакат раҳбарининг асосий ҳаво транспортига айланади. Бу ҳақда NBC News хабар берди.

Маълум қилинишича, тақдимот Вашингтон яқинидаги Эндрюс ҳарбий-ҳаво базасида бўлиб ўтган. Трамп янги Boeing 747-8 самолётида тадбирга етиб келган ва уни шахсан кўздан кечирган.

Янги борт қизил, оқ ва тўқ кўк ранглардаги янги дизайнга эга бўлиб, аввалги президент самолётларидан ташқи кўриниши билан фарқ қилади.

Трампнинг таъкидлашича, самолёт 4 июль куни АҚШ мустақиллигининг 250 йиллиги муносабати билан Вашингтон осмонида ўтказиладиган йирик авиашоуда иштирок этади.

“Бу самолёт билан ҳеч ким рақобат қила олмайди. Мамлакатимиз самолёти айнан шундай бўлиши керак. Ҳеч ким унга ҳатто яқин ҳам келолмайди”, деган Трамп.

АҚШ Президенти янги лайнерни “учувчи Оқ уй” деб атаб, унда ҳозиргача кўрилмаган даражадаги қулайлик ва ҳашамат яратилганини таъкидлаган. Шунингдек, у яқин вақт ичида амалдаги президент самолётларидан фойдаланишни тўхтатишига ишора қилган.

Нашр маълумотларига кўра, самолётнинг бозор қиймати тахминан 400 миллион долларни ташкил этади. Бироқ уни президент эҳтиёжларига мослаштириш, хавфсизлик тизимлари ва махсус жиҳозлар ўрнатиш учун қўшимча равишда бир миллиард доллардан ортиқ маблағ сарфлангани айтилмоқда.

Оқ уйнинг маълум қилишича, Трампнинг президентлик муддати якунланганидан кейин самолёт унинг президентлик кутубхонаси жамғармасига топширилади.

Аввалроқ, Қатардан бундай қимматбаҳо совғани қабул қилиш АҚШда қонунчилик, этика ва хавфсизлик масалалари бўйича баҳс-мунозараларга сабаб бўлган эди. Шунга қарамай, 2025 йилнинг май ойида АҚШ мазкур самолётни расман қабул қилиб олган.