Трамп Илон Маскка катта интервью бермоқчи

Оқ уйнинг собиқ раҳбари Дональд Трамп SpaceX асосчиси, америкалик тадбиркор Илон Маскка катта интервью беришини эълон қилди. Бу ҳақда собиқ президент Truth Social'даги саҳифасида маълум қилди.

АҚШда жорий йилнинг ноябрь ойида бўлиб ўтиши режалаштирилган сайловда Республикачилар партиясидан президентликка номзод Дональд Трамп 12 августда Тesla эгаси Илон Маск билан катта интервью ўтказилишини айтди. Бироқ у интервью бўйича батафсил тафсилотларни келтириб ўтмаган.

“Мен душанба куни кечқурун Илон Маскка интервью бераман, батафсил маълумот кейинроқ эълон қилинади”, деб ёзган Трамп.

Собиқ президентнинг Маск билан режалаштирилган суҳбати Демократик партиядан президентликка номзод ва вице-президент Камола Ҳаррис Миннесота губернатори Тим Уолзни ўзига вице-президентликка номзод сифатида танлаганидан ҳамда Маск ўзи яратган Трампни қўллаб-қувватловчи сиёсий ҳаракатлар қўмитасининг текширувлари ошкор этилиши ортидан кейин содир бўлди.

Жорий йилнинг июль ойида миллиардер Илон Маск АҚШ президентлигига Республикачилар партиясидан номзод Дональд Трампнинг сайловолди кампаниясига хайрия қилганди. Ўшанда тадбиркор Трампни қўллаб-қувватловчи America PAC сиёсий фаоллик қўмитасига пул ўтказганди.

Трамп номзодини қўллаб-қувватлаётган America PAC амалиётига Шимолий Каролина Бош прокуратураси ва Мичиган давлат котиби ҳам эътибор қаратмоқда.

Маск, шунингдек, Х ижтимоий медиа компаниясининг эгаси бўлиб, илгари компания жамоатчиликка тегишли бўлганида Тwitter номи билан танилган. 2021 йилнинг 6 январида Капитолий биносига қилинган уюштирилган ғалаёндан сўнг Трампнинг профили тақиқлагунга қадар, собиқ президент кўп йиллар давомида Тwitter'нинг ашаддий фойдаланувчиси эди. Маск Twitter'ни 44 миллиард долларга сотиб олганидан кейин тақиқ бекор қилинди.

Эслатиб ўтамиз, аввалроқ Трамп ўзига суиқасд уюштирилган шаҳарда митинг ўтказмоқчилиги хабар қилинганди.