Трамп II Жаҳон урушидаги ғалабага АҚШ шарофати билан эришилганини айтди

АҚШ Президенти Дональд Трамп Иккинчи жаҳон урушидаги ғалабага АҚШ шарофати билан эришилганини айтди. У бу ҳақда Ғалаба куни деб эълон қилинган 8 май декларациясини имзолаш маросимида сўз очди.

“Бу ҳафта бутун дунёда Иккинчи жаҳон уруши иттифоқчилари ғалабани нишонламоқда, лекин АҚШ ҳеч қачон бу кунни тўлақонли байрам қилмаган, гарчи ғалаба, асосан, биз туфайли эришилган бўлса ҳам. Сиз хоҳлайсизми ёки йўқми, биз бу урушга кириб, уни ютдик. Ажойиб иттифоқчиларимиз бор эди, лекин, ўйлайманки, ҳеч ким АҚШ асосий куч бўлганини инкор эта олмайди”, деди Трамп.

Оқ уй сайтида жойлаштирилган декларацияда 8 май куни Америка халқи ўз ватанини, эркинлигини ва Ғарб цивилизациясининг омонлигини ҳимоя қилиб, ҳалок бўлганларни хотирлаши қайд этилган.

“Америка аскарлари берган қурбонликларсиз бу урушда ғалаба қозонишнинг иложи йўқ эди ва бугунги дунё бутунлай бошқача кўринишга эга бўларди”, дейилади ҳужжатда.

Эслатиб ўтамиз, аввалроқ Трамп 8 майни расмий Ғалаба куни сифатида белгилаш ва 11 ноябрда нишонланадиган Ветеранлар кунини Биринчи жаҳон урушидаги Ғалаба куни деб ўзгартириш ниятида эканини билдирганди. Ўшанда у кўплаб Америка иттифоқчилари аллақачон 8 майни нишонлашини эслатган, бироқ АҚШ “бошқа барча давлатларга қараганда кўпроқ ҳисса қўшганини” айтганди.