Трамп G20 саммитини бойкот қилиш билан таҳдид қилди

АҚШ Президенти Дональд Трамп 22-23 ноябрь кунлари Йоханнесбургда бўлиб ўтадиган “Катта йигирмалик” (G20) саммитини бойкот қилиш билан Жанубий Африка Республикасини таҳдид қилди. Тошкент вақти билан бугун, 8 ноябрь куни тунги пайтда ўзининг Truth Social ижтимоий тармоғидаги навбатдаги хабарномасида Оқ уй раҳбари яна бир бор бу мамлакатни оқ танли фермерларни “ўлдириш” ва уларнинг ерларини “ноқонуний тарзда мусодара қилиш”да айблади.

“Инсон ҳуқуқлари бузилиши давом этар экан, АҚШ ҳукумати вакилларидан ҳеч бири саммитда иштирок этмайди”, деб ёзди Трамп, ўз даъволарига далиллар келтирмасдан. 

У 2025 йилги G20 саммитининг ЖАРда ўтказилишини “тўлиқ шармандалик” деб атади.

Трамп ноябрь ойидаги саммитда иштирок этмаслигини илк бор 5 сентябрда айтган эди. Унинг ўрнига АҚШ вице-президенти Жеймс Дэвид Вэнс Йоханнесбургга бориши кутилган эди. Бироқ Трампнинг янги баёнотидан маълум бўлишича, Вэнснинг сафаридан ҳам воз кечилган.

ЖАР Президенти Сирил Рамафоса 21 май куни Оқ уйга қилган ташрифи чоғида Дональд Трамп унинг мамлакатида “оқ танли фермерлар оммавий равишда ўлдирилаётгани” ҳақида баёнот берди ва буни тасдиқловчи “фотосуратлар”ни кўрсатди. “Reuters” агентлигининг маълум қилишича, ушбу суратлардан бирида аслида Конго Демократик Республикасидаги Гома шаҳрида исёнчилар билан тўқнашувдан кейин қурбонлар жасадлари солинган қопларни олиб кетаётган қутқарувчилар акс этган.

Оваль кабинетдаги музокара пайтида Рамафоса “оқ танли озчиликка қарши геноцид” ҳақидаги айбловларни кескин рад этди.

Трамп келтирган яна бир “далил” – қишлоқ йўли бўйлаб жойлашган юзлаб оқ крестлар акс этган видеотасвирлар бўлган. Президент буни “ўлдирилган минг нафар фермер қабрлари” деб таъкидлаган, аммо KNA агентлиги маълум қилишича, бу тасвирлар аслида 2020 йилда ЖАРнинг шарқий қисмида ўтказилган норозилик акциясидан олинган.

Дональд Трампнинг айтишича, 2026 йилги G20 саммити декабрь ойида унинг Майами яқинидаги Дорал шаҳрида жойлашган гольф-клуби ва меҳмонхона-масканлар мажмуасида ўтказилади. 

“Ҳа, у Доралда бўлади. Ҳамма саммит айнан шу ерда бўлишини истайди, чунки у аэропортга жуда яқин, бу энг яхши ва гўзал жой”, деган Трамп сентябрь бошида.

Республикачи Президент саммит ташкил этилишидан “ҳеч қандай молиявий фойда кўрмаслигини” ҳам таъкидлади: 

“Бу пул ҳақидаги келишув эмас”, деди у. 

Шунингдек, Трамп саммитда Россия Президенти Владимир Путин ва Хитой Раиси Си Цзиньпинни “мамнуният билан қабул қилишини” айтди.

“Washington Post” эсга солганидек, Трамп ўзининг илк президентлик даврида ҳам “Катта еттилик” (G7) саммитини шахсий гольф-клубида ўтказишни режалаштирган, бу эса кўплаб танқидларга сабаб бўлган эди.