Трамп F-35 қирувчиларининг Туркияга сотувини қайта тиклаши мумкин – NYT

АҚШ Президенти Дональд Трамп Туркия Президенти Ражаб Тойиб Эрдўғанга Анқарани F-35 бешинчи авлод қирувчи самолётлари дастурига қайта қўшишга тайёрлигини маълум қилиши кутилмоқда. Бу ҳақда “The New York Times” тўрт нафар юқори лавозимли маъмурият расмийсига таяниб хабар берди.

Хабар Трампнинг НАТО саммитида иштирок этиш учун Анқарага йўл олгани ва у ерда Эрдўғон билан учрашиши кутилган бир пайтда эълон қилинган. Саммит бугун, 7 июль куни кечқурун бошланади.

Нашр маълумотига кўра, расмийлар Трамп Конгресс ва амалдаги қонунчилик чекловларини қандай айланиб ўтишга ҳаракат қилиши борасида турлича фикр билдирган. Бироқ уларнинг айтишича, бу масала бўйича икки давлат раҳбари ўртасида расмий мактублар алмашинуви бўлиши мумкин.

Туркиянинг 2019 йилда Россиядан S-400 ҳаво ҳужумидан мудофаа тизимини сотиб олиши Анқара ва Вашингтон ўртасидаги муносабатларни совутган ҳамда Конгресснинг Туркияни қўллаб-қувватлашини қийинлаштирган эди. Бунга жавобан АҚШ Туркияга қарши санкциялар жорий қилган ва уни F-35 қирувчи самолётлари дастуридан чиқарганди.

Шунингдек, Конгресс Анқара S-400 тизимига эгалик қилар экан, Туркияга F-35 самолётларини сотишни тақиқловчи қонунни қабул қилган. АҚШ қонунчилари Россия тизими Америкада ишлаб чиқарилган жанговар самолётлар хавфсизлигига таҳдид солишини таъкидлаган.

Бу масала Дональд Трамп даврида икки давлат муносабатлари яхшиланганига қарамай, АҚШ ва Туркия ўртасидаги асосий келишмовчиликлардан бири бўлиб қолмоқда.

Шу билан бирга, бу хабар икки давлат муносабатлари яхшиланаётганининг яна бир белгиси сифатида баҳоланган. “Reuters” кўрган расмий ҳужжатга кўра, ўтган ой Трамп маъмурияти Туркияга қиймати 700 миллион АҚШ долларидан ортиқ бўлган ўнлаб авиация двигателларини сотиш нияти ҳақида Конгрессни расман хабардор қилганди.

Эслатиб ўтамиз, ўтган йил 25 сентябрь куни АҚШ Президенти Дональд Трамп Оқ уйда Туркия Президенти Ражаб Тойиб Эрдўған билан учрашув ўтказганди. Трамп учрашувда Эрдўғанга Россиядан нефть сотиб олишни тўхтатиш ҳақидаги илтимосини қабул қилишига ишонишини айтган ва Анқарага илғор F-35 қирувчи самолётларини харид қилиш имконини бериш учун АҚШ санкцияларини бекор қилиши мумкинлигини маълум қилганди.