Трамп Эронга ҳазил қилди

АҚШ Президенти Дональд Трамп Ҳормуз бўғозини “Трамп бўғози” деб қайта номлашни таклиф қилди. Бироқ бир неча соат ўтиб, АҚШ раҳбари бу гапини жиддий айтмаганини билдирди. Бу ҳақда у кеча, 2 сентябрь куни ўзининг X ижтимоий тармоғидаги саҳифасида ёзиб қолдирди.

“Энди у АҚШ назоратида экан, Ҳормуз бўғозининг номини “Трамп бўғози”га ўзгартирсак-чи? Американинг ўзи каби, у ҳам ҳар қачонгидан “қизғинроқ” бўлади!” деб ёзган Трамп.

Шундан сўнг Оқ уй ижтимоий тармоқларда Трамп таклиф қилган ном кўрсатилган Форс кўрфази харитасини эълон қилган.

Трамп сўнгги ҳафталарда Ҳормуз бўғозига нисбатан АҚШ суверенитетини ўрнатиш ҳақида бир неча бор гапирган. У ҳатто бўғозни “АҚШнинг янги ҳудуди” сифатида кўрсатган харитани ҳам эълон қилган.

Кейинроқ Овал офисида журналистлар Трампдан Ҳормуз бўғозини қайта номлаш таклифига жиддий қарайётган-қарамаётганини сўраган.

“Бу шунчаки айтиб қўйилган гап эди”, дея жавоб берган Президент кулиб.

Эслатиб ўтамиз, аввалроқ АҚШ Президенти Дональд Трамп Ҳормуз бўғозини АҚШ ҳудуди деб эълон қилган эди. Шунингдек, у Канада билан давом этаётган савдо уруши фонида Онтарио кўлининг номини “Америка кўли” (Lake America) деб ўзгартириш тўғрисидаги фармонни имзолаганди.