Трамп дунё императори эмас – да Силва

Бразилия Президенти Луис Инасиу Лула да Силва Америка раҳбари Дональд Трампни фақатгина АҚШ Президенти экани, у дунё императори эмаслигини айтди. Бу ҳақда Бразилия раҳбари CNN нашрига берган интервьюсида сўз очди.

Қайд этилишича, Луис Инасиу Лула да Силва бундай кескин фикрни Трамп Бразилияга нисбатан бож жорий этмоқчи бўлгани учун билдирган. Трамп яқинда ўзининг Truth Social платформасида Бразилияга 1 августдан бошлаб 50 фоизлик бож ставкалари қўллаш билан таҳдид қилган эди. У бу қарорни Бразилиядаги собиқ президент Жаир Мессиас Болсонаруга қарши суд иши билан боғлаган. Трамп Болсонаруни ўзининг иттифоқчиси деб билади ва унга нисбатан олиб борилаётган судни адолатсизлик деб атаган.

Болсонару 2022 йилги президентлик сайловларида мағлуб бўлганидан кейин ҳокимиятни ағдаришга уринишда айбланмоқда. Агар айби исботланса, у 40 йилдан ортиқ қамоқ жазосига ҳукм қилиниши мумкин.

Лула Трампнинг аралашувини рад этган. Унинг сўзларига кўра, Бразилияда суд ҳокимияти мустақил ва Президент унга таъсир ўтказа олмайди.

“Болсонаруни шахсий жиҳатдан эмас, балки у амалга оширишга уринган ҳаракатлари, яъни давлат тўнтариши учун суд қилишмоқда”, деган Бразилиянинг амалдаги раҳбари. 

Шунингдек, Лула Трампнинг сўзларига ҳайрон бўлганини билдириб, бу ижтимоий тармоқдаги постни аввалига ёлғон янгилик деб ўйлаганини айтган. 

“Бу жуда нохуш бўлди. Мен бундай пост ҳақиқат бўлиши мумкинлигига ишонмадим”, деган у. 

Шунингдек, Президент Бразилия Трамп таҳдидини амалга оширса, жавоб тариқасида ўз божларини жорий қилишини айтган. 

“Бразилия ўз халқининг манфаатларини ҳимоя қилади, бизга мажбурлаш эмас, музокаралар керак. Агар Трамп музокараларни жиддий қабул қилса, мен музокарага тайёрман. Энг муҳим нарса – биз ўзаро ҳурмат асосида суҳбат қуришимиз керак”, деган Лула. 

Сўзини якунлар экан, Бразилия раҳбари Трампни халқ сайлагани ва у АҚШ Президенти эканини қўшимча қилган. 

“Мен прогрессив эмасман, мен Бразилия Президентиман. Трампни император сифатида эмас, АҚШ Президенти сифатида кўраман – уни америкалик халқ сайлаган”, деган Луис Инасиу Лула да Силва.

Эслатиб ўтамиз, аввалроқ Бразилия Президенти АҚШ Президенти Дональд Трампга мурожаат қилиб, уни “камроқ интернетда ўтиришга ва кўпроқ давлат раҳбари бўлишга” чақирганди.