Трамп барчани Twitter ва Facebook’дан чиқиб кетишга чорламоқда 

АҚШнинг собиқ Президенти Дональд Трамп Twitter’ни демократия учун шармандалик деб атади. Бу ҳақда собиқ Президентнинг матбуот хизмати тарқатган баёнотда айтилади.  

Трамп коронавирус ҳақида ёлғон маълумот тарқатгани учун Вакиллар палатаси аъзоси Маржори Тейлор Гриннинг Twitter’даги аккаунти блокланишига изоҳ берган. 2021 йил 6 январда Трампнинг тарафдорлари Капитолийга бостириб кирганидан сўнг, унинг ўзи ҳам Twitter’да бутунлай блокланганди. 

“Twitter демократия учун уят. Маржори Тейлор Грин кўплаб ҳалол, ватанпарвар ва меҳнатсевар сайловчиларни ифодалайди. Улар “паст” Twitter ва Facebook’дан бундай муносабатга лойиқ эмас. Ҳамма Twitter ва Facebook’ни тарк этиши керак. Улар зерикарли. Улар бизнинг мамлакатимиз учун уят. Сен эса, Маржори, курашда давом эт!”, деган Трамп. 

Маълумот ўрнида, Facebook ижтимоий тармоғи ҳам 2021 йил 6 январдан кейин Трампни блоклаган, бироқ келажакда бу қарорни қайта кўриб чиқиш имкониятини сақлаб қолган.