Трамп “автократ” бўлиш борасида ҳазиллашмаяпти

АҚШ Президенти Дональд Трамп АҚШ Конституциясини бузиши ва бу орқали учинчи муддатга сайланиши ҳақида ҳазиллашмаётганини айтди. У бу ҳақда кеча, 30 март куни NBC News телеканалига берган интервьюсида маълум қилди.

Трамп АҚШ Конституциясининг 22-тузатиш бўйича тақиқланган Оқ уйда учинчи муддатга сайланиш тақиқини четлаб ўтиш истаги реаллигини ошкор қилиб, буни амалга оширишнинг усуллари борлигини айтди. У NBC News телеканалига берган махсус интервьюсида илгари ҳам бир неча бор айтилган бу мақсад борасида ҳазил қилмаганига аниқлик киритди.

"Кўп одамлар буни қилишимни хоҳлайди. Аммо мен уларга айтмоқчиманки, бизда узоқ йўл бор, биласизми, бу учун ҳали жуда эрта. Мен ҳозирги нарсаларга эътибор қаратяпман", деди Трамп 30 март куни эрталаб NBC News билан телефон қўнғироғида.

АҚШ Президенти яна бир муддатни хоҳлайсизми, деган саволга, "Мен ишлашни яхши кўраман", дея жавоб қайтарди. Унга учинчи муддатга сайланишга рухсат бериш режалари тақдим этилганми ёки йўқми, деган саволга Трамп: "буни қила оладиган усуллар мавжуд", деган. 

Шунингдек, NBC News вице-президент Жеймс Дэвид Вэнс президентликка номзод бўлиши ва кейин ролни Трампга топшириши мумкин бўлган сценарий мавжудлиги ҳақида сўради. Трамп эса “бу мавжуд усуллардан бири”, дея қисқа жавоб қилди. Трампдан бошқа усуллар ҳақида ҳам гапириш сўралганда, у шунчаки “йўқ” деб жавоб берган.

Икки муддат чекловини бекор қилиш учун Конституцияга ўзгартириш киритиш жуда қийин бўлади, бу ўзгартиришларни киритиш учун Конгресснинг учдан икки қисми ёки конституциявий конвенция чақиришга рози бўлган штатларнинг учдан икки қисмининг овози талаб қилинади. Аммо бу етарли бўлмайди. Чунки мазкур тўсиқлардан ўтилгач, юқоридаги иккала йўналиш ҳам штатларнинг тўртдан уч қисмининг ратификациясини талаб қилади.

Трамп аввалроқ учинчи муддатга сайланиш ҳақида фикр билдирган, бироқ республикачилар бу изоҳларни ҳазил ёки Президент ўз танқидчиларини троллинг қиляпти, деб билишган. Айни пайтда Трампнинг иттифоқдоши Стив Беннон “News Nation” телеканалига берган интервьюсида Трамп “2028 йилда сайловда қатнашиб, яна ғалаба қозонишига” ишонишини айтди. Беннон ўша интервьюда президентлик учун максимал икки муддатга эга бўлишига қарамай, Трамп учинчи муддатга қандай номзод бўлиши мумкинлигини борасидаги сўровга "бизда бир нечта альтернативлар бор" деб айтди.

Маълумот ўрнидан шуни таъкидлаб ўтиш жоизки, АҚШ конституциясидаги 22-тузатиш икки марта президент этиб сайланган ҳар бир кишини яна сайланишини тақиқлайди. Шунингдек, ушбу тузатишга кўра, икки йилдан ортиқ давом этган ва мандати тугамаган президентлик муддатини тўлдирган кишига ҳам икки мартадан ортиқ президент этиб сайланиш тақиқланади.