Трамп АҚШнинг НАТОдан чиқишини жиддий ўйлаётганини айтди

АҚШ Президенти Дональд Трамп альянс мамлакатлари Эронга қарши урушга қўшилмагани сабабли, мамлакатнинг НАТОдан чиқиши ҳақида жиддий ўйлаётганини айтди. Бу ҳақда у “The Telegraph” нашрига берган интервьюсида сўз очди.

“НАТО менга ҳеч қачон таъсир ўтказмаган. Мен уларнинг “қоғоз йўлбарслар” эканини доим билганман ва айтганча, Путин ҳам буни билади”, дейди Трамп.

АҚШ Президенти иттифоқчилар томонидан ёрдам берилмаганига “ишониш қийин бўлганини” айтган. У шунчаки “Ҳей” деб қўйганини ва уларнинг иштирокини қаттиқ талаб қилмаганини қайд этган. Трампнинг фикрича, НАТО давлатлари урушда автоматик равишда иштирок этишлари керак эди.

“Биз ҳамма жойда, жумладан, Украинада ҳам автоматик равишда бор эдик. Украина бизнинг муаммомиз эмас эди. Бу синов эди ва биз уларнинг ёнида бўлдик, доим улар билан бирга бўлардик. Улар эса биз билан бирга бўлишмади”, дея қўшимча қилган у.

Эслатиб ўтамиз, жорий йилнинг 17 март куни Дональд Трамп НАТО давлатларини Эронга қарши ҳарбий операцияда қатнашиш ва Ҳормуз бўғозини очишга ёрдам беришдан бош тортгани учун танқид қилган эди. Унинг сўзларига кўра, альянсга аъзо мамлакатлар, айниқса “зарур бўлган пайтда” Қўшма Штатлар учун “ҳеч нарса қилишмаяпти”, ваҳоланки Америка расмийлари уларнинг ҳимояси учун “юзлаб миллиард доллар” сарфламоқда. Шундан сўнг у АҚШ унинг илтимосини рад этган давлатларга энди ёрдам бермаслигини маълум қилди.