Трамп АҚШ маълум муддатгача Эронга ҳужум қилмаслигини айтди

АҚШ Президенти Дональд Трамп жорий йил ноябрь ойида бўлиб ўтадиган оралиқ Конгресс сайловларигача Эронга ҳужум қилинмаслигини билдирди. Унинг айтишича, Вашингтон ва Теҳрон ўртасида урушни тугатиш бўйича самарали музокаралар олиб борилмоқда. Бу ҳақда у ўзининг Truth Social ижтимоий тармоғидаги саҳифасида ёзиб қолдирди.

“Биз Эрон Ислом Республикаси билан самарали музокаралар олиб бормоқдамиз. АҚШда 3 ноябрь куни бўлиб ўтадиган оралиқ сайловларгача Эронга ҳужум қилмаймиз”, деб ёзган Трамп.

Маълумот учун, жорий йилнинг 3 ноябрь куни АҚШда оралиқ Конгресс сайловлари бўлиб ўтади. Унда Вакиллар палатасининг барча 435 ўрни ҳамда Сенатнинг учдан бир қисми учун сайлов ўтказилади. Оралиқ сайловлар президентлик сайловлари оралиғида, президентнинг тўрт йиллик ваколат муддати ўртасида бўлиб ўтади. Сайлов натижалари Конгресснинг ҳар икки палатасида қайси партия кўпчиликни ташкил этишини белгилайди.

Эслатиб ўтамиз, АҚШ ва Исроил февраль ойида Эронга зарбалар беришни бошлаган. Олти ойдан бери давом этаётган уруш Трампнинг мамлакат ичидаги рейтингига салбий таъсир кўрсатган. Можаро ноябрь ойидаги сайловларда Конгрессдаги кўпчилик ўрнини сақлаб қолишга уринаётган республикачилар учун ҳам муаммога айланган.

Сўнгги ҳафталарда АҚШ ва Эрон урушни тугатиш ҳамда жаҳон энергетика таъминоти учун муҳим бўлган Ҳормуз бўғозини қайта очиш бўйича таклифлар алмашган. Бироқ Трамп Эроннинг сўнгги таклифини рад этган.

Эслатиб ўтамиз, аввалроқ АҚШ вице-президенти Жей Ди Вэнс Эрон АҚШ билан урушни тугатиш учун уранни бойитиш қувватларини сезиларли даражада қисқартириши кераклигини айтган эди.