Трамп АҚШ криптовалюта захирасини яратиш режасини эълон қилди

АҚШ Президенти Дональд Трамп яқинда АҚШнинг “крипто стратегик захираси”ни яратиш режасини эълон қилди, бу эса Bitcoin (BTC), Ripple (XRP), Solana (SOL) ва Cardano (ADA) каби криптовалюталар нархининг сезиларли даражада ошишига олиб келди. Бу ҳақда мамлакат Президенти ўзининг Truth Social ижтимоий тармоғида хабар берди.  

Трампнинг айтишича, ушбу захира АҚШни “дунёнинг крипто пойтахти”га айлантиришга қаратилган. Унинг дастлабки постида XRP, Solana ва Cardano киритилган бўлса-да, кейинчалик Bitcoin ва Ethereum ҳам захирага қўшилиши тасдиқланган.

Бу қарор Трампнинг илгари криптовалюталарга нисбатан билдирган шубҳаларидан сезиларли бурилиш бўлиб, энди у ушбу соҳани фаол қўллаб-қувватламоқда. Шунингдек, Трамп Оқ уйда крипто саммитини ўтказишни режалаштирмоқда, унда крипто саноатининг етакчи вакиллари иштирок этади.

Трампнинг бу постидан кейин, Bitcoin нархи 94 164 долларга (11% ўсиш), Ethereum эса 2 516 долларга (13% ўсиш) етди. Умумий криптовалюта бозорининг қиймати 300 миллиард долларга ошган.

“Бу қарор АҚШ ҳукуматининг крипто саноатига фаол иштирок этишига ишора қилади. Натижада институционал инвестициялар ошиши ва тартибга солиш аниқроқ бўлиши мумкин”, дейди “21Shares” компаниясининг АҚШ бўлими раҳбари Федериcо Брокате.

Баъзи мутахассисларнинг фикрича, АҚШ Конгрессининг рухсатисиз ушбу стратегик захира ташкил этилиши қийин бўлиши мумкин. Бироқ АҚШ Ғазначилик департаментининг Валютани барқарорлаштириш фонди (Exchange Stabilization Fund) орқали бу режа амалга оширилиши эҳтимоли ҳам мавжуд.

Шунингдек, Трамп ҳукумати жиноий ишлар доирасида мусодара қилинган криптовалюталардан захира яратиш вариантини ҳам ўрганмоқда.

Эслатиб ўтамиз, 2025 йилнинг 25 февраль куни Bitcoin нархи 5,5 фоизга пасайиб, 88 800 долларгача тушганди. Бу эса ноябрь ўрталаридан бери энг паст кўрсаткич ҳисобланади.